मन्त्री खान नेकपा एस तिर लागेका दिपक मनाङे परे फन्दामा ! सांसदकै सपथ खान नपाउने

मनाङको प्रदेशसभा २बाट प्रदेशसभा सदस्यमा निर्विरोध निर्वाचित भएका दिपक मनाङे रातारात माधव कुमार नेपाल नेतृत्वको नेकपा एसमा प्रवेश गरे पछि राजनितीक वृतमा निकै चर्चा चल्यो । मन्त्री हुनैका लागी एस पार्टीमा प्रवेश गरेका मनाङेलाई सांसदनै बन्न नपाउने अवस्था आएको छ ।

संसदीय राजनितीमा एक विकृत पात्रको रुपमा चिनिएका मनाङेलाई नेकपा एसका अध्यक्ष माधव कुमार नेपालले निकै तामझामका साथ पार्टीमा भित्राएका थिए । गण्डकीमा नेकपा एस जिरो भए पछि त्यहि मौकामा हिरो बन्न एस तिर लागेका मनाङेलाई ठूलो धक्का लागेको छ ।

मनाङे विरुद्धको मुद्धा अदालतमा विचाराधिन रहेकाले उनले प्रदेशसभा सदस्यको सपथनै खान नपाउने भएका छन् । अघिल्लो पटकको निर्वाचनमा अदालतलाई समेत झुक्काएर सांसद र मन्त्री हुन सफल भएका उनी यस पटक भने सुरुमै फन्दामा पर्ने भएका छन् ।

मनाङेविरुद्ध ३१ वैशाख ०६१ मा अर्का चर्चित डन चक्रेमिलन भनिने मिलन गुरुङलाई महाराजगन्जस्थित चुफाङ रेस्टुरेन्टमा तरबार प्रहार गरेकोमा ज्यान मार्ने उद्योगमा मुद्दा छ । मनाङे समूहको आक्रमणबाट मिलनको बायाँ हात दुई ठुन्का भएको थियो ।

त्यतिवेला पक्राउ परेका उनलाई १३ वैशाख ०६२ मा अदालतले पुर्पक्षका लागि जेल पठाएको थियो । दुई वर्ष जेल बसेका उनीविरुद्धको ज्यान मार्ने उद्योगसम्बन्धी मुद्दा अझै सर्वोच्चमा विचाराधीन छ । उनीविरुद्ध २८ साउन ०६९ मा तत्कालीन पुनरावेदन अदालत पाटनले ज्यान मार्ने उद्योगमा पाँच वर्ष कैद सजाय सुनाएको थियो । तर, फैसला भने पाँच वर्षपछि मात्रै सार्वजनिक भयो ।

त्यतिवेला फैसला जानकारी नहुँदा उनले ०७४ को निर्वाचनमा मनाङ ९ख० बाटै सांसद जितेर प्रदेश सांसदको शपथ पनि खाए । फैसला सार्वजनिक भएपछि भने उनलाई तत्कालीन महानगरीय प्रहरी परिसर काठमाडौंले स्वयम्भूबाट ०७५ मंसिरमा पक्राउ गर्‍यो । तर, अदालतको आदेश थाहा नभएको जनाउँदै उनले सर्वोच्चमा पुनरावेदनको दरपीठ गरे । सर्वोच्चले उनलाई २८ मंसिर ०७५ मा जेलबाहिरै बसेर मुद्दा लड्न पाउने सुविधासहितको आदेश दियो । २७ हजार तीन सय ३५ रुपैयाँ धरौटी बुझाएर छुटेका उनी त्यसपछि गण्डकी प्रदेशको खेलकुदमन्त्री बने ।

‘०७४ को निर्वाचनमा मनाङेले सांसद पदको शपथ खाए । त्यसवेला उच्चको फैसला सार्वजनिक नै गरिएको थिएन ।मनाङे अहिले पनि सर्वोच्चमा तारेखमै छन् । सर्वोच्चका प्रवक्ता विमल पौडेल मनाङेविरुद्धको मुद्दा नटुंगिएको बताउँछन् । ‘मनाङेविरुद्धको मुद्दा सर्वोच्चमा विचाराधीन छ । उनी तारेखमा छन्, मुद्दा चलिरहेको छ,’ पौडेलले भने ।

प्रतिनिधिसभा सदस्य निर्वाचन ऐन, २०७४ को दफा १३ मा उम्मेदवारको योग्यता तोकिएको छ । यो दफामा त्यस्ता मुद्दा खेपेका व्यक्ति सांसदको उम्मेदवार नै बन्न नपाउने उल्लेख छ । दफामा ‘भ्रष्टाचार, जबर्जस्ती करणी, मानव बेचबिखन तथा ओसारपसार, लागुऔषध बिक्री–वितरण तथा निकासी, सम्पत्ति शुद्धीकरण, राहदानी दुरुपयोग, अपहरणसम्बन्धी कसुर वा नैतिक पतन देखिने अन्य फौजदारी कसुरमा सजाय पाई वा कुनै कसुरमा जन्मकैद वा १० वर्ष वा सोभन्दा बढी कैदको सजाय पाई त्यस्तो फैसला अन्तिम भएको व्यक्ति प्रतिनिधिसभाको उम्मेदवार बन्न पाउनेछैन’ भनिएको छ । यो व्यवस्था प्रदेश सभाको हकमा पनि लागू गरिएको छ ।

एक सिटे पार्टी बन्नका लागी मनाङेलाई रातो कार्पेट विच्छाएर पार्टीमा भित्राएका माधव नेपाल समेत यस्तो खबरले तनावमा पर्ने अवस्था आएको छ । मनाङमा नेकपा एसले जम्मा १७ भोट मात्रै ल्याएको थियो । संसदीय राजनितीको विकृत पक्षलाई भरपुर उपयोग गरेर पावरमा बस्ने बानी लागेका मनाङे यस पटक भने नमज्जाले फस्ने देखिएको छ ।