एक्लिए भिम रावल, उनले मेरो भनेर टाउको गनेकाहरु सबै लागे माधव नेपाल तिर

लामो समय माधव नेपाल तिर लागेर ओली विरुद्ध कडा रुपमा प्रस्तुत हुँदै आएका भिम रावल पछिल्लो समय एमाले अध्यक्ष केपी ओली सँग नजिकिएका छन् ।

अडान भएका नेताका रुपमा चिनिएका रावल पछिल्लो समय दोधारे चरित्रका कारण हल्ला बन्दै गएका छन् । एमालेमा रावलको पनि छुट्टै गुट छ तर अब उनी आफ्नै गुटमा एक्लीँदै गएका छन् ।

नेकपा एमाले औपचारिक रूपमा विभाजन भएपछि कुन दल रोज्ने भन्ने विषयमा अन्योलमा रहेका नेताहरू बिस्तारै खुल्न थालेका छन्। छुट्टा छुट्टै पार्टीको रूपमा गतिविधि अघि बढाएपछि पार्टीका तल्लो तहसम्मका नेताहरू आफू कुन दलमा रहेन भन्ने विषयमा खुल्न थालेका हुन्। उनीहरू पार्टीका गतिविधिहरूमा सहभागी हुन थालेका छन्।

निर्वाचन आयोगले वरिष्ठ नेता माधवकुमार नेपाल पक्षलाई फरक पार्टी ‘नेकपा एकीकृत समाजवादी’ दर्ताका लागि सनाखत गर्न आगामी भदौ ९ गते बोलाएको छ। आयोगबाट नयाँ दल दर्ताको प्रमाण पत्र पाएपछि तल्लो तहका नेताहरूले २१ दिनभित्र आफ्नो दल रोजिसक्नु पर्नेछ। लामो समयदेखि नेपाल पक्षमा रहेका एमाले स्थायी समिति सदस्यहरूले भने पार्टी विभाजन गर्ने नेपालको निर्णयमा साथ दिएनन्। नेपालको साथ छोड्नेमा एमाले उपाध्यक्ष भीम रावल पनि छन्।

रावल अहिले एकताको पक्षमा लागि परेका छन्। सुदूरपश्चिममा रावलको प्रभाव राम्रो रहेको छ। केन्द्रमा उनले लिने निर्णयले सुदूरपश्चिममा प्रभाव पार्ने आंकलन धेरैको रहेको छ। यद्यपि नेपालको अध्यक्षतामा निर्वाचन आयोगमा दर्ता प्रक्रियामा रहेको नेकपा एकीकृत समाजवादी पार्टीमा लाग्न रावललाई दबाब लिइरहेका छन्। तर, रावलले आफू विभाजनमा नजाने बताउँदै आएका छन्। उनले पार्टी एकताको मोडालिटी तयार पार्ने जिम्मेवारी समेत पाएका छन्। रावलले एमालेमा रहने संकेत गरेपछि उनी निकट सुदूरपश्चिमका नेताहरू साथ छोड्न थालेका छन्।

काठमाडौंमा जारी दर्ताको प्रक्रियामा रहेको नेकपा (एकीकृत समाजवादी)को केन्द्रीय समितिको बैठकमा रावलनिकट सुदूरपश्चिमका नेताहरू सहभागी भएका छन्। रावलनिकट रहेका झपट रावल बाहेक सबै नेताहरू समाजवादीको केन्द्रीय समितिको बैठकमा सहभागी भएको बुझिएको छ। नेता रावलको अत्यन्त निकट मानिने अछामबाट राष्ट्रियसभा सदस्य शेर बहादुर कुँवर पनि सहभागी छन्। कुँवर अछाममा रावलको व्याक बोन मानिन्छन्। अछाममा एमालेका अध्यक्ष रहेका कुँवरलाई केपी शर्मा ओलीले अपदस्थ गरेका थिए। कुँवरले अन्ततः रावलको साथ छोडेका छन्।

त्यस्तै सुदूरपश्चिम प्रदेशका भौतिक पूर्वाधार मन्त्री दीर्घ सोडारी समेत बैठकमा सहभागी छन्। रावलका अत्यन्त निकट मानिने सोडारीको प्रदेश सभामा समेत बलियो पकड छ। सोडारीले पनि रावलको साथ छोडेका छन्। समाजवादीको बैठकमा सुदूरपश्चिमबाट प्रतिनिधि सभा सदस्य प्रेम आले, बिना बुढाथोकी, लक्ष्मी चौधरी र निरादेवी जैरु पनि सहभागी छन्। त्यस्तै उर्वादत्त पन्त, राम कुमार ज्ञवाली, बीर बहादुर बुढाथोकी र बिक्रम शाही पनि समाजवादीको केन्द्री समितिको बैठकमा सहभागी छन्।