प्रचण्ड भन्छन्– म प्रधानमन्त्री बन्नु देश र जनताका लागि फाइदाजनक छैन

नेकपा माओवादी केन्द्रका अध्यक्ष पुष्पकमल दाहाल प्रचण्डले सिट बाँडफाँट आजै टुंग्याउने बताएका छन् । त्यसका लागि आज अपराह्न तीन बजेदेखि शीर्ष नेताहरुले छलफल गर्ने उनले जानकारी दिए ।

पोखरा विमानस्थलमा आज बिहान आयोजित पत्रकार भेटघाटमा प्रचण्डले भने, ‘तीन बजेदेखि टुंगाउने गरि आज छलफल गर्दैछौं ।’ सिट बाँडफाँटको सहमति नजिक पुगेको उनको भनाइ छ ।

‘नेताहरुको अरु तिर कार्यक्रम नभएको भए हिजै टुंगिने अवस्था बनिसक्या थियो । तालमेलका लागि जलि समस्या भएको केही पनि छैन । तालमेलमा हामीले समझदारी बनाएर नै जान्छौं,’ उनले भने ।

प्रचण्डले आफू प्रधानमन्त्रीको दौडमा नभएको पनि दाबी गरेका छन्। पोखरा विमानस्थलमा संचारकर्मीसँग कुराकानी गर्दै प्रचण्डले सो कुरा बताएका हुन्।

‘मैले त भनेको छु, प्रधानमन्त्रीकै इच्छा गरेको भए म पहिला पनि हुनसक्थेँ। ०७४ को निर्वाचन लगत्तै पनि पाँचै वर्षका लागि मेरो ढोका खुला थियो। तर मैले वाम गठबन्धनलाई प्राथमिकता दिएर छाडेको हो,’ प्रचण्डले भने, ‘अहिले पनि प्रधानमन्त्रीको कुरामा त्यस्तो डिवेट भएको पनि छैन, गर्नेमा पनि छैन।’

अहिले पनि आफू प्रधानमन्त्री बन्ने चाहना राख्दा हने स्थिति भएको उनले खुलाए। ‘तर, म अहिले हुँदिन, त्यो देश र जनताको लागि पनि फाइदाजनक हुँदैन,’ प्रचण्डले भने, ‘त्यसकारण म यो रेसमा छैन।’

सम्बन्धित समाचार

प्रकाशित: सोमबार, मंसिर २३ २०८२