माधव नेपालका मान्छेलाई केपी ओली सँग भन्दा मदन भण्डारी सँग ठूलो रिस

नेकपा एमाले विभाजन गराएर एकिकृत समाजवादी पार्टी दर्ताका लगी निवेदन दिएर पार्टी दर्ताको प्रमाणपत्र नआउँदै माधव नेपालका पार्टीका नेताहरु जनताको बहुदलीय जनवादका विरुद्ध खनिन थालेका छन् ।

नेकपा एमालेले मार्गदर्शक सिद्धान्त मान्दै आएको जनताको बहुदलीय जनवाद प्रति माधव नेपालका टिमका नेतालाई कति ठुलो रहेछ भन्ने कुरा पहिलो दिन देखीनै देखिन थालेको छ । पार्टी अध्यक्ष माधव नेपालले पार्टीको मार्गदर्शक सिद्धान्त बाट जबज हटाइदिएका छन् ।

नेकपा एमालले जनताको बहुदलीय जनवादलाई आफ्नो सबैभन्दा ठूलो प्रतिष्ठा र आर्दश मान्छ । तत्कालिन महासचिव मदन भण्डारीले प्रतिपादन गरेको सिद्धान्त जबजलाई नै लामो समय देखी मार्गदर्शक सिद्धान्त बनाएको एमालेले यसको कसैले विरोध गर्दा प्रतिवाद गर्दै आएको छ ।

मदन भण्डारी सँग प्रत्यक्ष जोडिएको र मदन भण्डारीकै लोकप्रियताको जगमा एमालेले आफ्नो हैसियत बनाएका कारण पनि एमालेजनहरुको जबज प्रति भावनात्मक प्रेम रहेको छ । तर एमाले फुटाएर बाहिरिने बित्तिकै माधव नेपालहरु जबज विरुद्ध खनिन थालेका छन् ।

तत्कालिन समयमा मदन भण्डारीले जबजको सिद्धान्त प्रतिपादन गर्ने बेलामा नै जबजलाई दक्ष प्रजापतीको टाउको भन्दै कडा प्रतिवाद गरेका झलनाथ खनाल अहिले जबजको सबैभन्दा ठूलो विराधी भएर निस्किएका छन् । इण्डीयाको हस्पीटलको बेडबाटै खनालले जबज विरुद्ध धावा बोलेका छन् ।

दिल्लीस्थित एपोलो अस्पतालको बेडबाटै चन्द्रागिरिमा जारी प्रस्तावित पार्टीको केन्द्रीय कमिटी बैठकलाई मंगलबार अडियो सम्बोधन गर्दै पूर्व प्रधानमन्त्रीसमेत रहेका खनालले अब क्रान्तिकारी शैलीमा अघि बढ्नुपर्नेमा पनि जोड दिए।

बुधबार निर्वाचन आयोगमा नयाँ पार्टीका लागि गरिने सनाखतमा दूतावासमार्फत वारेसनामा पठाएका खनालले नयाँ निर्माणका लागि विद्रोह स्वभाविक भएको उल्लेख गरे।

अध्यक्ष ओलीको अवसरवादी नेतृत्वका कारण दुई दल मिलेर बनाइएको नेकपाको एकता पनि भताभुंग भएको उनले बताए। दुईतिहाइ नजिकको सरकार पनि नरहेको उनले बताए।

साढे तीन वर्ष शासन चलाउने क्रममा ओलीले मनपरी गरेको आरोप लगाए। ‌ओलीले सरकारको नीति तथा कार्यक्रम र बजेट पनि ओलीले पार्टीलाई थाहै नदिइ ल्याएको बताए। पार्टीले सरकारमार्फत देशलाई समाजवादतिर लैजानु भन्दा ओलीले दलाल पुँजीवादको यात्रा अघि बढाएको भन्दै खनालले आक्रोश पोखे।

‘ओलीविरुद्धको यो विद्रोह नयाँ निर्माणका लागि हो, नयाँ क्रान्तिका लागि हो’, उनले भने, ‘ओलीविरुद्धको विद्रोहले नयाँ पार्टी बन्छ। तपाईं हामी ओलीविरुद्ध विद्रोहको बिन्दुमा आइपुगेका छौँ। केशरजंगविरुद्ध पनि विद्रोह भएको थियो।’

एमालेमा अहिले एउटा समूह मध्यन्थका रुपमा रहेको उनले बताए। ‘मध्यपन्थ पनि अवसरवादकै एउटा रुप हो। त्यसले अन्तिममा दक्षिणपन्थलाई सघाउँछ’, एमालेका दोस्रो पुस्तालाई लक्षित गर्दै उनले भने, ‘मध्यपन्थको आयु कहिले लामो हुँदैन। चाँडै नै त्यसले आफ्नो परिणाम देखाउँछ। हाम्रो केन्द्रमा जन्मिएको मध्यपन्थ अब अन्त्य भएको छ।’

उनले दक्षिणपन्थी र अवसरवादमाथि गहिरो हमला चाहिएको पनि बताए। ‘दक्षिणपन्थी अवसरवादमाथि जति गहिरो हमला गर्छौँ, त्यति नै हामी बलियो हुन्छौँ’, उनले भने, ‘राजनीतिक एकताले मात्रै पार्टी एक हुँदैन। वैचारिक र सैद्धान्तिक एकता पनि चाहिन्छ।’

उनले अब नयाँ क्रान्तिका लागि पार्टी दर्ता गरिहाल्न आग्रह गरे। ‘सबैभन्दा पहिले हामी पार्टी दर्ता गरौँ। पार्टी दर्ता गरेपछि नीति सिद्धान्त अपडेट हुनुपर्छ’, खनालले थपे, ‘अब हाम्रोमा जनवादी क्रान्ति सकियो। जनताको बहुदलीय जनवाद पनि सिद्धियो, अब हामी समाजवादको यात्रामा अघि बढ्नुपर्छ।’

खनालले आफूहरु तिनै भीरपाखमा जन्मेकाले त्यसले केही फरक नपार्ने पनि बताए। उनले दोस्रो पुस्ताका नेताहरु कुन ठाउँमा पुगेका छन् विश्लेषण गर्नुपर्ने पनि बताएका छन्।