अग्नी सापकोटालाई दुई दिन पछि हुने तनाव आजै दिए महेश बस्नेतले

नेकपा एमालेका सांसद एवं युवा नेता महेश बस्नेतले सभामुख अग्नी सापकोटालाई दुइ दिन पछि हुने तनाव पनि आजै देखी दिएका छन् ।

सरकारले भदौ २३ गते देखी संसदको अधिवेशन बोलाएको छ । एमाले नेता बस्नेतले सभामुख अग्नी सापकोटा सँग संसद बैठकमै भेट हुने भन्दै चेतावनी दिएका छन् । सापकोटाले राजनितिक पक्षधरता देखाएको भन्दै बस्नेतले सबै हिताब किताब हुने बताएका छन् ।

एमालेले कारबाही गरेका १४ सांसदलाई पदमुक्त नगरेर सभामुख सापकोटाले एमालेप्रति पूर्वाग्रह राखेको माओवादी अध्यक्ष पुष्पकमल दाहालको इशारामा चलेको आरोप लगाएका हुन् ।

युवा संघले सोमबार काठमाडौंमा आयोजना गरेको कार्यक्रममा सांसद बस्नेतले राजनीतिक पूर्वाग्रह नत्यागेमा सभामुखको विरोध संसद्‌मा नै गरिने चेतावनी दिएका छन् । ‘सभामुखले राजनीतिक दलको सदस्यता त्याग्नुपर्छ । प्रचण्डको कार्यकर्ता बनेर सदनमा आउनुभयो भने २३ गते तपाईंसँग हाम्रो प्रत्यक्ष भेटघाट हुनेछ, उनको चेतावनी थियो, ‘२३ गते प्रमुख प्रतिपक्षी देख्नुहुनेछ ।’

वैशाख २७ गते प्रधानमन्त्री केपी शर्मा ओलीलाई विश्वासको मत दिने क्रममा संसद् बैठक बहिष्कार गरेर पार्टीको ह्वीप उल्लंघन गर्ने सांसदलाई एमालेले कारबाही गरेको र त्यसलाई सभामुख सापकोटाले राजनीतिक पूर्वाग्रह राखेर पदमुक्त नगरेको बस्नेतको भनाइ थियो ।

एमालेले भदौ १ गते संघीय संसद् सचिवालयलाई पत्र लेखेर माधवकुमार नेपाललगायत १४ सांसदलाई पदमुक्त गर्न भनेको थियो । सभामुख सापकोटाले त्यो पत्रअनुसार कारबाही नगरेपछि सांसद बस्नेतलगायतले सभामुखको कार्यकक्षमा गएर धर्ना दिएका थिए ।

नेपालको नेतृत्वमा भदौ ९ गते नयाँ पार्टी गठन भएपछि सभामुखले कारबाही सिफारिसको औचित्य नभएको निर्णय गरेका थिए । जसको एमालेले विरोध गर्दै आएको छ । संघीय संसद्को आगामी अधिवेशन बुधबार ४ बजेबाट सुरू हुँदैछ ।

सांसद बस्नेतले एमालेबाट विभाजित भएर गठन भएको नेकपा (एकीकृत समाजवादी)ले एमालेलाई चुनौती दिन नसक्ने दाबी गरे । व्यक्तिगत स्वार्थ र मन्त्रीको लोभ गरेकाहरू पार्टी विभाजित गरेर गएकाले उनीहरूले एमालेलाई चुनौती दिन नसक्ने उनको भनाइ थियो ।