यस्ता कुरा पनि आउँछ अग्नी सापकोटालाई !

सभामुख अग्नीप्रसाद सापकोटालाई प्रमुख प्रतिपक्षी दल नेकपा एमालेले माओवादी गुरील्लाको आरोप लगाइरहँदा सापकोटाले भने फरक दावी गरेका छन् ।

सभामुख सापकोटाको भुमिका अभिभावकिय नभएको आरोप एमालले लगाएको छ । प्रमुख प्रतिपक्षी एमाले र सभामुख सापकोटाको टसलका कारण लामो समय देखी संसद चल्न सकिरहेको छ्रैन । यहि परिवेशमा सभामुख सापकोटाले भने आफुले गरेको सबै काम देश र जनताको लागी भएको को दावी गरका छन् ।

आफ्नो लागी नेपाल आमा भन्दा ठुलो कुरा केहि नभएको भन्दै सापकोटाले आफुले अहिले सम्म देशभक्तीको मामलामा कसै सँग सम्झौता नगरेको र अब पनि नगर्ने प्रष्ट पारेका छन् । आफ्नो कदम संविधानको रक्षाका लागी भएको उनले जिकिर गरेका छन् ।

सापकोटाले अरु सबै कुरालाई गौण बनाएर आफूले देशको सेवा गरिरहेको जिकिर गरेका छन् । गृहजिल्ला सिन्धुपाल्चोक पुगेका उनले देशको व्यवस्था, संविधान र प्रतिनिधिसभाको रक्षाका लागि सबैभन्दा बढी समय दिएको दावी गरे ।

सभामुख सापकोटाले आफ्नो बुद्धि, विवेक, योग्यता र क्षमताले भ्याएसम्म २४ सै घण्टा जनताको सेवामा समर्पित हुने प्रतिबद्धता जनाए । उनले भने ‘म जनताको शीर झुक्ने कुरा कहिल्यै गर्ने छैन, देशभक्ति र सदाचारमा कहिल्यै सम्झौता गर्ने छैन, मातृभूमिका खातिर जीवनको अन्तिम घडीसम्म कसैसँग झुक्ने छैन ।’

भारतीय देशभक्त भगतसिंङको स्मरण गर्दै उनले देशभक्तिभन्दा ठूलो केही नहुने बताए । सभामुख सापकोटाले भने, ‘नेपाल आमाभन्दा ठूलो यो दुनियाँमा हाम्रा लागि केही पनि छैन ।’

दुई वर्षदेखि मुलुकले कोरोना, राजनैतिक र प्राकृतिक प्रकोप बेहोरेर ती संकट पार हुँदै गएको बताउँदै उनले अब समृद्धिको यात्रामा लाग्नुपर्नेमा जोड दिए ।

सभामुख सापकोटाले सिन्धुपाल्चोकको बलेफी गाउँपालिकामा-४ मा आज फ्याफुल्ला युवा क्लबको नवनिर्मित भवन उद्घाटन गरेका छन् । स्थानीय विकास पूर्वाधार कार्यक्रमको २० लाख, प्रदेश सरकारको ३० लाख र बलेफी गाउँपालिकाबाट ५ लाख गरी ५५ लाख लगानीमा क्लबको दुइतल्ले भवन र खेल मैदान निर्माण गरिएको छ ।