ऋषि धमलाको उपद्रो भाइरल

पत्रकार ऋषि धमलाले नेपाल बार एसोसियसनको गोप्य बैठकमा गएर उपद्रो मच्चाएका छन् ।

गोप्य बैठक चलिरहेका बेला हामी लाइभमा छौँ भन्दै हस्याङफस्याङ गरेर बैठक स्थलमा छिरेर बोलेका धमलाको भिडियो यतिखेर सामाजिक संजालमा भाइरल भएको छ । पत्रकारिता क्षेत्रका व्यक्तिहरुले धमलाको यस्तो उपद्रोको आलोचना गरेका छन् ।

सामाजिक संजालमा निकै भाइरल भएको भिडियोमा मिश्रीत खालको प्रतिक्रिया आएको छ । पत्रकारिता क्षेत्र भन्दा बाहिरका मानिसले यस्तो काम धमलाले मात्रै गर्न सक्ने भन्दै कतिपयले पशंसा पनि गरेका छन् केहिले त ले फुटबलमा पेले र नेपाली पत्रकारीतामा धमला उस्तै हुन् सम्म लेखेका छन्।

पत्रकारिता क्षेत्रलाई वुझेकाहरुले भने आलोचना गरेका छन् । धमलालाई भारल मोहले डुबाएको भन्दै आलोचकहरुले यस्तो हर्कतलाई पत्रकारीता मान्न नसकिने तर्क गरेका छन् । गोप्य बैठक बसिरहेको ठाउँमा गएर बिना अनुमती लाइभ गर्नुलाई पत्रकारीता मान्न नसकिने उनीहरुको तर्क छ।

प्रधानन्यायाधीस चोलेन्द्र शम्शेरको राजीनामा मागका विषयमा सल्लाहकारहरुसँग बारका पदाधिकारीहरु गोप्य छलफल गरिरहेका थिए । क्यामरासहित धमला स्वाँस्वाँ फ्वाँफ्वाँ गर्दै हलभित्र पसेर लाइभ गर्न थालिहाले । छलफलमा व्यस्त अधिवक्ताहरुमाझ एकछिन सन्नाटा छायो ।

धमला भन्न थाले, ‘यहाँ बारको वैठक चलिरहेको छ, र हामी प्रत्यक्ष प्रशारणमा छौं । किनभने देशको ध्यान अहिले बारतिर छ ।’
कार्यक्रमका सहभागीहरु ट्वाँ परेर उनलाई हेरिरहेका थिए । धमला मञ्चमा बसेका बयोवृद्ध वरिष्ठ अधिवक्ता कृष्णप्रसाद भण्डारीतर्फ लम्किए ।

‘देशका भिष्मपितामह’ भन्दै माइक तेस्र्याएर उनले भण्डारीलाई प्रश्न गरे, ‘वरिष्ठ अधिवक्ताज्यू तपाईंलाई के लाग्छ रु’
भण्डारी जवाफ दिन थाले, ‘हामीले कम्मर कस्नुपर्छ‘’

तर भण्डारीले बोल्दाबोल्दै बारका अध्यक्ष चण्डेश्वर श्रेष्ठले हस्तक्षेप गरे । उनले धमलाको माइक नै समातेर उनलाई त्यहाँबाट निस्कन आदेश दिए । धमलाले कुनै प्रतिवाद गर्न सकेनन् । उनी ‘हामी प्रत्यक्ष प्रशारणमा छौं’ भन्दै बाहिर निस्किए ।
ढोका बाहेर पनि उनले एकाध अधिवक्तालाई तानेर ‘बाइट’ लिन खोजे । तर, त्यसमा पनि सफल भएनन् ।