चोलेन्द्र र देउवा एउटै ड्याङका मूला हुन् :चित्रबहादुर केसी

राष्ट्रिय जनमोर्चाका अध्यक्ष चित्रबहादुर केसीले प्रधानमन्त्री शेरबहादुर देउवा र प्रधानन्यायाधिश चोलेन्लद्र शमशेर जबरा बराबरी दोषी भएको बताएका छन् ।

ओटीभी नेपाल डक कम सँगको विशेष कुराकानीमा अध्यक्ष केसीले कार्यपालीका र न्यायपालिका मिलेर भाग खाने र दिने भन्ने लोकतन्त्रमा कल्पनै गर्न नसकिने कुरा भएको तर यिनीहरुले गरिरहेका बताएका छन् ।

कार्यपालिकाको भाग न्यायपालिका प्रमुखलाई पनि दिने कुराको आफ्नो पार्टीले कदापी समर्थन गर्न नसक्ने भन्दै केसीले केपी ओलीले गरेको संसद विघठनको विरुद्धमा मात्रै देउवा प्रचण्डलाई साथ दिएको तर यस्तो फोहोरी खेलमा आफुहरु सामेल नरहेको पनि उनले बताए ।

गठबन्धनमा बसे पनि आफ्नो पार्टी सत्तापक्ष नभएर प्रतिपक्ष भएको भन्दै केसीले यस्तो फोहोरी कुराको पनि समर्थन गर्नु पर्छ भनेर सरकारमा नगएर प्रतिपक्षमा बसेको बताए । किन्तु परन्तु कुनै पनि हालतमा कार्यपालिका र न्यायपालिका विच भाग शान्ति गर्ने कुराको समर्थन गर्न नसक्ने केसीले प्रष्ट पारेका छन् ।

चोलेन्द्र शमशेरको राजिनामाले मात्रै पनि न्यायपालिका भित्र रहेको विकृतीको अन्त्य नहुने उनले बताए । यो भनेको प्रवृती हो र यो प्रवृती चोलेन्द्र गए पनि बाँकी रहने केसीको मत छ , यधपी यति धेरै कुरा उठिसके पछि राणाले राजिनामा दिनुनै उपयुक्त हुने केसीले बताए ।

चोलेन्द्रलाई न्यायाधिश बनाएर सर्वोच्चमा छिराउँने बेलैमा आफुले विरोध गर्दा तत्कालिन सुनुवाइ समितीमा आफुलाई एक्लो पारिएको भन्दै भाग खाने चलन पहिले देखीनै चलेको केसीले बताए । उ बेलामा मलाई एक्लो बनाए अहिले भाग मागेको हल्ला गर्दैछन् केसीले भनेका छन् ।

भाग लिने र दिने कुरामा सबैको एक मत हुने भन्दै केसीले यस्तो मामलामा सत्ता र प्रतिपक्ष दुवैको बोली एउटै हुने बताए । फेरी पनि लेनदेन मिल्यो भने यो बिषयमा बोलेका सबैको बोली बन्द हुने पनि केसीले बताए।