किन यस्तो गर्दैछ सरकार?दार्चुला घटनाका प्रत्यक्षदर्शी प्रहरीको निगरानीमा, पत्रकारलाई भेट्न दिइएन

महाकाली नदिमा तुइन तर्ने क्रममा इण्डीयन एसएसबीले तुइनको तार काटिदिँदा नदिमा खसेर वेपत्ता भएका दार्चुलाका जयसिंह धामीको बिषयले सदन देखी सडक सम्म तातेको छ । सरकारले छानविन गरि बाहिर ल्याउँने त बताएको छ तर सरकारको बोलीमा धेरैले विश्वास गर्न सकेका छैनन् । यस विच बाहिरिएको एउटा विषयले धेरैलाई झस्काएको छ ।

इण्डीएन एसएसबीले तुइन काटेर धामी खोलामा खेसेका प्रत्यक्ष देखेको व्यक्तीहरुलाई प्रहरीको निगरानीमा राखिएको छ उनीहरुलाई पत्रकार सँग कुराकानी गर्न दिइएको छैन । यस अघिनै प्रत्यक्षदर्शीले बोलको भिडियो सहित बाहिर आइसकेको अवस्थामा सरकारले किन पत्रकार सँग जान प्रत्यक्षदर्शीलाई रोकेका यस बाट गम्भिर प्रश्न उठेको छ । केहि दिन अघि मात्रै इण्डीयन पक्षको बचाउ गर्दै गृहमन्त्रालयले गलत समाचार प्रकाशन नगर्न पत्रकारलाई उर्दि जारी गरेको थियो ।

मिडियामा आएका विषयलाई उठान गर्दै हिजै मात्रै सत्तारुढ दल नेपाली काग्रसकै सांसद गगन थापाले सरकारले सत्यतथ्य पत्ता लगाउँछ भनेर हामीले कसरी विश्वास गर्ने भन्दै सदनमै प्रश्न उठाएका थिए ।.यसै विच गृह मन्त्रालयले घटनाबारे छानबिन गर्न मन्त्रालयका सहसचिव जनार्दन गौतमको संयोजकत्वमा गठन गरेको समिति दार्चुला पुगेर निरन्तर छलफलमा जुटेको छ।

समितिले घटनास्थलमा खटिएका सुरक्षाकर्मी तथा जिल्लास्थित सुरक्षाकर्मीसँग छलफल सकेको छ। जिल्ला प्रशासन कार्यालय दार्चुलाबाट घटना सम्बन्धमा वास्तविक सत्यतथ्य छानबिन गर्न सशस्त्र प्रहरी बल नेपाल नं ४४ गणका प्रहरी नायब उपरीक्षक वीरसिंह धामी, जिल्ला प्रहरी कार्यालय दार्चुलाबाट प्रहरी निरीक्षक नरेन्द्रबहादुर चन्द र राष्ट्रिय अनुसन्धान जिल्ला कार्यालयका विक्रमसिंह ढाँडसहितको टोली स्थलगत खटिएको थियो।

यस्तै समितिले बुधबार जिल्लास्थित पत्रकार, मानवअधिकारकर्मी, राजनीतिक दल र जनप्रतिनिधिसँग छलफल गर्ने कार्यक्रम रहेको सहसचिव गौतमले जानकारी दिए। यस्तै समितिले प्रत्यक्षदर्शीसँग सोधपुछ गरिरहेको छ।

टोलीलाई १० दिनभित्र छानबिन प्रतिवेदन बुझाउन भनिएको छ। समितिमा सुदूरपश्चिम प्रदेशका प्रहरी नायब महानिरीक्षक पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र दार्चुलाका सहायक प्रमुख जिल्ला अधिकारी ज्योत्स्नता भट्ट सदस्य रहेका छन्।

नेपाली भूभागबाट भारत प्रवेश गर्न लागेका बेला भारतीय सीमा सुरक्षा बल एसएसबीका दुई जवानले तुइन फुकालिदिएको र धामी महाकाली नदीमा खसेको प्रत्यक्षदर्शीले बताउँदै आएका छन्।

यद्यपि भारतीय प्रशासनले एसएसबीले गस्ती गरेको स्वीकार गरे पनि तुइन नकाटेको दाबी गरेको छ। छानबिन समितिको प्रतिवेदनअनुसार मात्रै सरकारले आवश्यक निर्णय लिने जनाएको छ।

उक्त टोलीले घटनाका प्रत्यक्षदर्शीहरू कल्यानसिंह धामी, अनिता धामी, विक्रम रङ्कोलीलाई खलङ्गा पुर्‍याएका छन् । प्रत्यक्षदर्शीलाई सोमबारदेखि प्रहरीको निगरानीमा राखिएको छ। उनीहरुलाई पत्रकारसँग भेटघाट गर्न दिइएको छैन।

जयसिंह धामी साउन १५ गते गाउँबाट सदरमुकाम खलङ्गा आउने क्रममा एसएसबीले तुइन फुकालिदिँदा बेपत्ता भएको स्थानीयवासीको भनाइ छ। बेपत्ता धामीको शव अझै भेटिएको छैन।