एमाले छोड्ने घोषणा गरेका सुभाष कर्माचार्यलाई सह-योद्धाको भावुक सन्देश !

प्रिय कमरेड Subhas Karmacharya
४० वर्षसम्म पसिना बगाएको पार्टी छाडेको घोषणा गर्नु भएछ । यो घोषणाको ड्राफ्ट तयार गर्दै गर्दा कमरेडका हातहरु पक्कै काँपे होलान । अरुलाई त प्रत्यासित लाग्यो होला म जस्ता थुप्रै पार्टी कार्यकर्तालाई भने अप्रत्यासित लागेको छ । हठात निर्णय लिनु भएको हैन होला । सोची, सम्झि, जोड घटाउ, नाफा घाटा थुप्रै कुराको हिसाव गर्नु भएको होला । तपाईसंगको यति लामो संगतले पनि तपाई भावनामा बहकिने स्वभावको मान्छे हैन भन्ने कुरामा त कुनै शंका छैन ।

नेकपा सोचे जसरी एकिकरण हुन सकेन । त्यसकालका हाम्रा भूमिका के रहे सबै कुरा अव सम्झिनु जरुरी छैन । एमाले जेठ २ मा फर्किए पछि सबै आआफनो भुमिकामा रहेर जिम्मेवारी सम्हाल्नु सबैको दायित्व हो । चितवनमा सम्पन्न महाधिवेसनमा तपाई केन्द्रीय सदस्यमा अट्नु पथ्र्यो । तपाई जत्तिको योगदान र क्षमता भएको व्यक्ति केन्द्रीय सदस्यमा नअट्नु पर्ने कारण छैन । तर देश भरिबाट 301 जना र त्यसमा पनि पुरुश 200 जना मात्र हुने अवस्थामा जिल्लाले पुरानो 3 जनामा थप 1 जनाको कोटा पाउनु सानो कुरा पक्कै थिएन । 2 जनाको कोटा पाउदा बहस हुने कुरै थिएन । थप एक जना मात्र हुदा मेरो मत क सरेशको पक्छेमा रहेकै हो ।

मेरो भन्दा अरुको मत फरक हुन पाउछ । तर आफ्नो मत जाहेज रहेको कुरामा ढुक्क छु । एक पटक अपेक्षित पोर्टफोलियोमा नसेमेटिदैमा पार्टी नै त्याग्दै जाने प्रवृति सहि हो र ? ४० वर्षको पार्टी गतिविधिमा तपाईले कहिलै पनि पार्टी भन्दा व्यक्ति ठुलो हो भनेर भन्नु भएन । पद नपाए विद्रोह गर्नु नैसर्गिक अधिकार हो भनेर कहिल्यै भन्नु भएन । पद पाउने जति पार्टीबाट न्याय पाएका र पद नपाउने जति अन्यायमा परेका हुन्छन भनेर कहिल्यै भन्नु भएन ।

बरु तपाईले भन्नु भयो, “अभियान प्रमुख हो, पद हैन ।” एमालेले चार चार पटकसम्म सांसदको टिकट तपाईलाई मात्रै दिदा हामिलाई त तपाईको व्यक्तित्व र ऊर्जा देखेर त्यो जायजै लाग्थ्यो । त्यति मात्र होइन तपाईका सिनियर र समकक्षीहरु समेत “हो त अभियान पो प्रमुख हो त पद नाथे के हो र” भनेर चित्त बुजाउथे । तिनलाई समेत तपाईले अवसर पाउदा आफु अन्यायमा परेको भान हुदैन थियो । तपाईकै जस्तै योग्याता क्षमता र योगदान हुने थुप्रै कमरेडहरु पद बाहिर छन् ।

४० वर्षसम्मको तपाईको विश्वास र आदर्षबाट आज एकाएक यस्ता खुद्रा मसिना कारण देखाएर तपाई कसरी सम्वन्ध विच्छेद गरें भन्न सक्नुहुन्छ ? पार्टिले तपाईलाई जत्ति ४/४ पटक कसैलाई टिकट दियो?

अलिकति मेरो कुरा गरौ- २ पटक पार्टी क्षेत्रको नेतृत्व गर्दै जिल्ला पार्टी सचिवालयको जिम्मेवारी समेत निर्वाह गरेर लगभग ३० वर्ष पार्टीमा निरन्तर विताउदा १४५ सदस्यीय जिल्ला कमिटी भित्र मेरो नाम एक थान जिल्ला कमिटी सदस्यमा नअट्दा समेत तपाइहरुकै प्रशिक्षणलाई विश्वास गरेर म आफुले विद्रोह गर्नु, सामजिक सन्जालमा लेख्नु त परै जाओस सोच सम्म आएन । यसमा मलाई कुनै पश्चाताप छैन । तपाईले सिकाउनु भएको थियो नि त- पद हैन अभियान प्रमुख हो भनेर । अनि तपाईको यो कदम चाहि जायज ठहरिएला र ?
अझै केही बिग्रेको छैन कमरेड! फर्किनुस । आफनो आदर्श माथि धोका नदिनुस ।