मलाई कसैले छुन सक्दैन भन्दै धमाधम क्यासिनो लाइसेन्स बाँढ्दै प्रेम आले !

बतास समूह विरुद्ध एक्सन लिएर चर्चामा आएका सँस्कृती ,पर्यटन तथा नागरिक उड्ययन मन्त्री प्रेम आलेले धमाधम क्यासिनोको लाइसेन्स बाँढ्न थालेका छन् ।

आले मन्त्री भए यता मात्रै ६ वटा नयाँ क्यासिनोले लाइसेन्स प्राप्त गरिसकेका छन् । यस अघिका मन्त्रीले प्रर्याप्त अध्ययन विना लाइसेन्स दिन नमिल्ने भन्दै थन्काएर राखेको फाइल पनी मन्त्री आलेकै ठाडो निर्देशनमा धमाधम खोलिन थालेको छ ।

आफु जनताको विचमा लोकप्रिय भएको र अब मलाई कसैले छुन सक्दैन भन्दै आलेले कर्मचारीलाई थर्काउने गरेको समेत पाइएको छ । आलेले मन्त्रालयमा हुकुमी शैलीमा निर्देशन दिने गरेको पाइएको छ । कर्मचारीहरुलाई आफुले भनेका फाइलहरु छानीछानी अघि बढाउँन निर्देशन दिने गरेको बताइएको छ ।

क्यासिनोको लाइसेन्स धमाधम वितरण थालेपछि उनी विवादमा तानिएका छन्। उनले क्यासिनोको लाइसेन्स जुन गतिमा वितरण गरिरहेका छन्, त्यसले शंका उब्जाएको यस क्षेत्रका जानकारहरु बताउँछन्।

चिनियाँ लगानीदेखि सम्पत्ति शुद्धीकरणको मुद्दा लागेका गुन्डानाइके बलराम सापकोटा ‘बले’ले सञ्चालन गर्न लागेको क्यासिनोलाई समेत लाइसेन्स दिएपछि मन्त्रीको गतिविधिमा प्रश्न उठाइएका छन्। आले अघिका पर्यटन मन्त्रीहरुले अध्ययनबिना लाइसेन्स दिन नहुने भनि थन्काएका फाइलहरु पनि उनले धमाधम खोलेर अनुमति दिन थालेका छन्।

कात्तिक २ देखि माघ १३ सम्म उनले पाँच वटा क्यासिनोलाई अनुमति दिएको पर्यटन मन्त्रालय स्रोतले जनाएको छ। मन्त्रालयका एक अधिकारीका अनुसार विगतमा यी क्यासिनोहरुलाई अनुमति दिनेबारे अध्ययन हुनुपर्ने भनि रोकिएका थिए। तर, मन्त्री आले आएपछि धमाधम स्वीकृति पाउन थालेका हुन्।

यससँगै क्यासिनोको संख्या २२ पुगेको छ। स्थानीय निर्वाचन हुने सम्भावित मिति नजिकिँदै गएका बेला र यही वर्ष संसदीय निर्वाचनसमेत हुने अवधि आउनलागेका बेला मन्त्रीको कार्यशैलीले आर्थिक लाभको आशंका गरिएको छ। मन्त्रालय स्रोतले पनि आर्थिक चलखेलकै कारण एकपछि अर्को क्यासिनोले अनुमति पाइरहेको दाबी गरेको छ।

प्रेम आले मन्त्री भए पछि कात्तिक २ गते मेची क्राउन प्लाजामा ‘भेगास रिक्रियसन नेपाल,’ कात्तिक ९ गते बेलिज इन्टरनेसनल प्रालिलाई क्यासिनो सञ्चालनको अनुमति पुस १६ गते कल्पत्रु होटल नेपालगञ्जमा क्यासिनो सञ्चालनका लागि भन्दै ओम इन्टरटेनमेन्ट प्रालिलाई क्यासिनो सञ्चालनको अनुमति दिइएको छ ।

त्यसै गरि पुस १४ गते सेपियर इन्टरटेनमेन्ट टेक्नोलोजी प्रालिलाई क्यासिनो सञ्चालनको अनुमति माघ ५ गते चिनियाँ लगानी भएको क्यासिनोलाई पाँचतारे होटल अलफ्टमा क्यासिनो सञ्चालन गर्नका लागि पूर्वस्वीकृति दिइएको छ ।

एक पछि अर्को क्यासिनो संचालनको अनुमती दिने क्रममा मन्त्री आलेले माघ १३ गते काठमाडौंको होटल अलफ्टमा क्यासिनो सञ्चालनका लागि वाल्डो डाइनाष्टि इन्टरटेनमेन्ट प्रालिलाई अनुमति दिएका थिए ।