माधव नेपालका मन्त्रीहरु एमसीसी पास गर्ने तर मन्त्री पद नछोड्ने लाइनमा !

नेकपा एमाले विभाजन गरेर बनेको नेकपा एसका अध्यक्ष माधव कुमार नेपाल निकै अप्ठेरोमा परेका छन् । भातृसंगठन एमसीसीको विरोधमा सडकमा उत्रिएका छन् भने मन्त्रीहरु पद छोड्न नमान्ने अवस्थामा पुगेका छन् ।

सरकारमा बसेर मन्त्रीको झण्डा हल्लाउँदै पनि हिँड्ने , सडकमा नाराजुलुस गर्दै एमसीसी मुर्दावादको नारा पनि लगाउँने दोहारो चरित्र माधव नेपालको पार्टीले देखाएको भन्दै आलोचना भइरहेको छ । यथाअवस्थामा एमसीसी पास गर्न नसकिने बताउँदै आएका नेपाल पछिल्लो समय अप्ठेरोमा पर्दै गएका छन् ।

एस पार्टी भित्रको झलनाथ खनाल लाइन एमसीसी पास गर्नै नुहुने लाइनमा देखिएको छ भने माधव नेपाल मझधारमा देखिएका छन् । केहि दिन अघि सम्म एमसीसी बारे कठोर सुनिएका नेपाल पछिल्लो समय लचक हुँदै गएका छन् ।

एमसीसी रोज्नेकी गठबन्धन रोज्ने एउटा मात्रै विकल्प बाँकी रहँदा नेकपा एस सबैभन्दा चेपुवामा परेको विश्लेषण सुरु भएको छ । गठबन्धन भत्कँदा भर्खरै बनेको पार्टी शिशु अवस्थामै समाप्त हुने जोखिम त एमसीसी पास गर्दा पनि उठ्ने नैतिक, राजनितिक प्रश्नले झनै ठूलो जोखिम हुने अवस्थामा उक्त पार्टी पुगेको छ ।

पछिल्लो पटक संसदमा एमसीसी टेबुल गर्ने मिती माधव नेपालकै कारण फागुन ८ गते सम्मका लागी सरेको छ । नेपालकै प्रस्तावमा प्रधानमन्त्री देउवा दुई दिन बैठक सार्न राजी भएका थिए । अधिकांश कार्यकर्ता एमसीसीको विरोधमा भए पनि मन्त्रीको झण्डा हल्लाएर हिँडेकाहरुले भने माधव नेपाललाई टर्चर दिन थालेको बताइएको छ ।

मन्त्री बनेकोहरु अधिकांशले एमसीसी पास गरेर भए पनि सरकार र गठबन्धन जोगाउँनु पर्ने दबाव माधव नेपाललाई दिएका छन् । शहरी विकासमन्त्री रामकुमारी झाँक्रीले सार्वजनिक रुपमै एमसीसीका बारेमा प्रधानमन्त्री शेरबहादुर देउवा र आफ्नो मत एउटै भएको अभिव्यक्ति दिएकी छिन् ।

एमसीसी हरहालतमा पास गरि छाड्न दौडधुपमा लागेका देउवा र झाँक्रीको एउटै मत भए पछि माधव नेपालका मन्त्री कुन मेन्टालिटीमा छन् भन्ने बुझ्न सकिन्छ । मन्त्री झाँक्रीले एमसीसीमा देउवा र आफ्नो मत एउटै हो सम्म मात्रै भनेकी छैनन् सडकमा आन्दोलन गर्नेले एमसीसी नरोक्ने रुखो अभिव्यक्ति पनि दिएकी छिन् ।

आफ्नै पार्टीका कार्यकर्ता एमसीसीको विरोधमा सडक तताइरहेका बेला सोहि पार्टीको नाममा मन्त्री बनेर झण्डा हल्लाइरहेकी झाँक्रीले सडक आन्दोलन बाट एमसीसी नरोकिने अभिव्यक्ति दिए पछि एस पार्टीकै कार्यकर्ताहरु आक्रोसित भएका छन्।

मन्त्री सरकार छोड्न नमान्ने, कार्यकर्ता एमसीसी बोक्न नमान्ने अवस्था आएकै बेला नेकपा एसले एमसीसी बारे निर्णय लिन बैठक बोलाएको छ । बैठक शनिबार बिहान ११ बजे बानेश्वरमा बस्ने प्रवक्ता जगन्ननाथ खतिवडाले जानकारी दिए ।

उनका अनुसार एमसिसी अध्ययन कार्यदलले केन्द्रीय सचिवालयमा बुझाएको प्रतिवेदनमाथि छलफल गरेर निष्कर्ष निकालिनेछ । सरकारले एमसिसी संसदमा टेबल गर्ने तयारी गरे पनि सत्तारुढ माओवादी केन्द्र र एकीकृत समाजवादी विरोधमा छन् ।

माओवादीले अहिलेको अवस्थामा एमसिसी अगाडि बढाउन नहुने निर्णय गरिसकेको छ । एकीकृत समाजवादीले भने आज निर्णय लिन लागेको हो । एमसीसीलाई लिएर अमेरिका र चिन समेत आमने सामने बन्ने अवस्था आए पछि स्थितीको गम्भिररता बढेको विश्लेषण गरिएको छ ।