एमसीसीबारे अमेरिकाको धम्की र चिनको प्रतिवाद बारे बोले केपी ओली

नेपालमा विवादित रहेको अमेरिकी सहयोग परियोजना एमसीसीका बारेमा अमेरिका र चिन बाट आएको प्रतिक्रिया र उत्पन्न परिस्थिती बारे नेकपा एमालेका अध्यक्ष केपी ओलीले मुख खोलेका छन् ।

एमसीसीमा हस्ताक्षर गर्ने गठबन्धननै अहिले पनि सरकारमा भएको भन्दै ओलीले उनीहरुको कारण नेपाल शक्ति राष्ट्रहरुको खेल मैदान बन्न लागेको बताए । अहिलेको सत्ताधारी गठबन्धनले देश भड्खालोमा हाल्न खोजेको भन्दै ओलीले कडा शब्दमा प्रहार गरेका छन्।

अहिले ठूला राष्ट्रहरू मसल लडाउने अवस्थामा पुग्न थालेका छन् भन्दै ओलीले यो अवस्था सम्म पुर्याएकै अहिलेको गठबन्धनवालाहरुले हो भनेका छन् । नेपालको अन्तराष्ट्रिय सम्बन्ध पुरै तहसनहसको अवस्थामा पुगेको ओलीको धारणा छ ।

हिजो मात्रै चिनले एमसीसीको विषय जोडेर कडा प्रतिक्रिया दिएको थियो । नेपालमा अमेरिकाले धम्की कुटनिति सुरु गरेको भन्दै चिनले यसको प्रतिवाद गर्ने चेतावनी दिए पछि ओलीले मुख खोलेका हुन् । ओलीले संसदबाटै टुंगो लगाउन खोजेको भए पनि त्यसबेला अहिलेको गठबन्धनले नै अवरोध गरेको बताएका छन् ।

शनिवार सूर्यविनायक नगर अस्पतालको उद्घाटन समारोहलाई सम्बोधन गर्दै उनले आफ्नो नेतृत्वमा सरकार रहँदा एमसीसी टुंगोमा पुर्‍याउन खोजिएको भए पनि असफल पारिएको उनले बताएका हुन् ।

‘हामीले संसद पेश गरौं, जे गर्ने हो संसदले गर्छ भनेका थियौं । जनप्रतिनिधिले छलफल गरेर टुंगो लगाउँछन् भनेका थियौं,’ ओलीले भने, ‘एमालेलाई सरकारबाट हटाएपछि पास गर्छौ भनेर पर सार्दै गए । अहिले एमसीसीकै कारण अन्तर्राष्ट्रिय सम्बन्ध नै तहसनहस बनाएका छन् ।’

‘५ वर्ष अगाडि अहिले जो सरकारमा छ उसैले एमसीसीमा सम्झौता गरेका थिए । उनीहरूले अहिलेसम्म संसदमा पुर्‍याउन सकेका छैनन्,’ ओलीले भने, ‘ठूला शक्तिराष्ट्रहरू नेपाल खेल मैदान हुने गरी उत्रिन थालिसके । ठूला राष्ट्रहरू मसल लडाउने अवस्थामा पुग्न थालेका छन् ।’

उनले भने, ‘सरकार सञ्चालन गर्ने पैसा छैन । आयोजना कटौती भएको छ । पुँजीगत खर्च भएको छैन । काम गरेको ठेकेदारले भुक्तानी पाउन सक्दैन । बैंकबाट ऋण पाउन सक्दैन । बैंकसँग पैसा छैन । देश चरम आर्थिक संकटतिर जाँदैछ । तर सरकार चटपटाउँदैन ।’