झोला भित्र हात्ति छिराउँन बालकोटको बार्दलीमा गगन थापा !

एमसीसी पास गर्न हतारिएका प्रधानमन्त्री शेरबहादुर देउवा र उनलाई झ्याप्पै काँध हालेर दौडिएका काग्रेस महामन्त्री गगन थापालाई एमसीसीको पिरलोले च्याप्नु सम्म च्यापेको छ ।

अमेरिकाले दिएको अन्तिम समय सिमा नजिकै आइपुग्दा सबै काम छोडेर देउवा र ओलीको टिम एमसीसी पास गराउँन दौडिएको छ । महामन्त्री गगन थापालाई सँगै लिएर दौडिएका देउवा दिनहुँ जसो ओली निवास बालकोट पुगिरहेका छन् ।

बालकोटलाई देखाएर खुमलटार तर्साउने रणनितीमा देउवाले चलाखी गरेको चर्चा पनि चलेको छ । सकेसम्म प्रचण्ड र माधव नेपाललाई गलाएर एमसीसीको पक्षमा तान्ने खेलमा देउवा लागे पनि प्रचण्ड र माधव तयार नभएको अवस्थामा उनीहरुलाई अचानो बनाएर भए पनि ओली सँग हातोमालो गर्ने तयारी देउवाले गरेका छन् ।

गठबन्धनमा रातो बत्ती बलिरहेका बेला एमाले काग्रेसको बसउठ निकै बाक्लिएको छ । एमालले आफ्नो माग पुरा नभए सम्म अन्य कुनै पनि कुरामा आफ्नो सहमती र संलग्नता नहुने प्रष्ट पार्दैै आएको छ भने काग्रेसले पहिला एमसीसी पास गर्न एमालेले सहयोग गरे अन्य मागहरु पुरा गरिदिने बचन दिएको छ ।

एमालेले सहकार्यको पहिलो सर्तका रुपमा आफुले कारबाही गरेका माधव नेपाल सहितका १४ जना सांसदलाई कारबाही या सभामखुको बहिर्गमनको सर्त राखेको छ । प्रचण्ड र माधव नेपाल एमसीसीमा नआए एमालेले उठाएको माग पुरा गर्न पनी काग्रेस तयार रहेको नेताहरुले बताएका छन् ।

ओलीको विरोध गरेरै चर्चामा आएका काग्रेस महामन्त्री गगन थापा पनि अहिले देउवा सँगै बालकोटको दैलोमा धाइरहेका छन् । अहिलेको गठबन्धन भत्किने भयो , अब सँगै जान सकिँदैन जस्ता अभिव्यक्तिहरु उनको मुखबाट निस्कन थालेका छन् ।

गगन थापा पनि अहिले माधव नेपाल सहितका १४ जनालाई कारबाही या सभामखु अग्नी सापकोटालाई हटाउँने कुरामा सहमत देखिएका छन् । रोचक कुरा त के छ भने अहिले केपी ओलीको घरैमा पुगेर तपाईका मागहरु पुरा गर्न तयार छौँ भनेर विन्ती विसाइरहेका थापा केहि समय अघि सम्म एमालेले संसदमा देखाएको व्यवहार र मागको बारेमा आलोचना गरेरै थाक्दैनथे ।

एमालेले लगातार संसद अवरोध गरिरहे पछि एक दिन गगन थापाले कडा आलोचना गरेका थिए । एमालेको माग पुरा गर्नै नसकिने खालको रहेको भन्दै उनले पेलेरै अघि बढ्नु पर्ने मत पनि राखेका थिए। अहिले उनै थापा हजुर हामी तपाईका माग पुरा गर्न तयार छौँ एमसीसी पास गर्न सघाउँनु पर्यो भनेर ओलीको दैलो धाइरहेका छन् ।

गगन थापाले केहि समय अघि एमालेले राखेका माग बारे आलोचनात्मक टिप्पणी गर्दै भनेका थिए ‘एमालेले झोला भित्र हात्ती छिराइदिनु पर्यो भने जस्तो माग गरिरहेका छ के यो पुरा गर्न सम्भव छ ? माधव नेपाल सहितका १४ जना हटाउँने या सभामुख हटाउँने यो माग त पुरा गर्नै सकिन्न । झोला भित्र हात्ति कसरी छिराउँन सकिन्छ ? ‘

अहिले तिनै थापा झोला भित्र हात्ति छिराउँन तयार भएका छन् र एमाललेले एमसीसी पारित गराउँन सहयोग गर्ने हो भने अन्य मागहरु पुरा काग्रेस तयार रहेको भन्दै अनुनय विनय गर्दै बालकोटको बार्दली पुगिरहेका छन् ।

एमाले नेताहरुले आफुले राखेका विषयमा एमसीसी पास नहुनु पूर्व छिनोफानो हुनुपर्नेमा जोड दिए । तर, ओलीले सभामुख नहटाइ एमसीसीमा एमालेले भाग लिन नसक्ने अडान राखे । काँग्रेस नेताहरुले भने फागुन १६ गतेभित्र एमसीसी पास गर्नुपर्ने भन्दै यी विषयमा त्यसपछि जान सकिने बताए ।

‘सभामुख हटाउन संख्या पुग्यो भने हामीलाई त्यसका लागि पनि १५–२० दिन समय लाग्छ । एमसीसी पास गर्न दुई दिन बाँकी छ,’ देउवाले बैठकमा भने, ‘आइतबार एमसीसीको पक्षमा मत दिनुस् । त्यसपछि कहाँ के गरेर जानुपर्छ, म सबै कुराका लागि तयार छु ।’

आइतबार एमसीसीमा साथ दिए एमालेसँग बाँकी जे जे डिल हुन्छ, पूरा गरौंला भन्ने काँग्रेसको चाहना छ । काँग्रेसका एक नेताले रातोपाटीसँग भने, ‘आइतबार संसदमा आएर एमालेले एमसीसीको पक्षमा भोट हालिदियोस् । एमसीसी पास होस् । संसद चलोस् । त्यसपछि एमालेले बाँकी जे जे डिल हुन्छ, पूरा गरौंला भन्ने काँग्रेसको चाहना छ ।’

एमालेले भने सभामुख हटाउने कुरालाई बटमलाइन बनाइरहेको छ । त्यसैले ओली र देउवाको छलफल टुंगोमा पुग्न यी कुरामा रोकिएको एक नेताले बताए । अहिलेसम्म छलफलको प्रकृति हेर्दा दुवै पक्षले एक अर्कालाई नाप्ने र जाँच्ने काम गरिरहेको देखिन्छ ।

बैठकपछि सरकारका प्रवक्ता तथा सञ्चारमन्त्री ज्ञानेन्द्रबहादुर कार्कीले भने काँग्रेस र एमाले एक ठाउँमा रहनुपर्नेमा ओलीले जोड दिएको बताएका थिए ।‘समुन्नत लोकतन्त्रलाई अगाडि बढाउने हो भने वृहत छलफल जरुरी छ । हाम्रो भेटघाटको क्रम जारी रहन्छ,’ उनले भने । एमालेका उपमहासचिव प्रदीप ज्ञवालीले प्रधानमन्त्री देउवाले अलिकति फराकिलो ढंगले लोकतन्त्रका लागि लडेका शक्ति मिल्नुपर्ने संकेत गरेको बताए ।

काँग्रेसबाट सहमतिका लागि कुनै ठोस प्रस्ताव भने नआएको उनको भनाइ छ । ‘आज ठोस प्रस्ताव आएन, अर्को बैठकमा आउँछ कि !’ ज्ञवालीले भने ।