प्रचण्ड ,अग्नी सापकोटा र जनार्दन शर्माहरुको पातलो लगौटीले लाज ढाक्न नसकेको त्यो क्षण ..

लामो समयको विवाद, किचलो र लफडाका विच अन्तत परमादेश बाट बनेको शेरबहादुर देउवा नेतृत्वको सरकार र उनका सहयात्री गठबन्धन दललेनै एमसीसी पारित गरेरै छोड्यो । राष्ट्रिय जनमोर्चा बाहेकका गठबन्धन दलले व्याख्यात्मक विश्लेषण सहित एमसीसीको पक्षमै हात उठाए ।

एमसीसीलाई गिजोल्नु सम्म गिजोल्ने काम नेकपा माओवादी केन्द्रका अध्यक्ष पुष्पकमल दहाल प्रचण्डलनै गरेका थिए आखिर एमसीसी पारित गराउँन उनलेनै महत्वपुर्ण भूमिका निर्वाह गरे । सत्ता र शक्तिका अघि प्रचण्ड र माधव नेपालका लागी सबैकुरा फिक्का हुन् भन्ने सन्देश उनीहरुले दिएका छन् ।

कुनै पनि हालतमा अमेरिकाले दिएको समय सिमाभित्रै एमसीसी पास गरिछाड्ने गरि दौडिएका प्रधानमन्त्री शेरबहादुर देउवा र उनलाई काँध हालेर हिँडेका काग्रेस महामन्त्री गगन थापा लगाएतको टिमले आफ्नो मिसन पुरा गरेको छ । व्याख्यात्मक घोषणाको बर्कोले अनुहार छोपे पनि प्रचण्ड र माधव नेपालको अवसरवादी चरित्र उदांगो भएको छ ।

एमसीसी विरोधी नारा रोक्ने बेला देखी पाँच महिनाको समय मागेर एमसीसी पारित गराउँने प्रतिवद्धता जनाउँदै अमेरिकालाई विन्तीपत्र हाल्ने प्रचण्ड हुँदै आफुले त्यस बेला गठबन्धन जोगाउँन मात्रै त्यसो गरेको भन्दै एमसीसी विरोधी आन्दोलन सडकमा चर्काउँन लगाउँन लगाउँने प्रचण्ड र आफैँले हात उठाएर एमसीसी पारित गराउँने प्रचण्ड सम्म आइपुग्दा उनका छिर्केमिर्के अनुहारहरु कयौँ देखियो ।

रोचक कुरा त एमसीसी पारित गर्ने दिन संसदमा यस्तो दृश्य देखियो एमसीसी टेबुल गर्न पर्यो भने मर्न तयार छु भन्ने सभामुख अग्नी सापकोटाले एमसीसी टेबुल मात्रै गराएनन् आफ्नै मुखले एमसीसी अनुमोदन भएको घोषणा समेत सगौरव गरे ।

एमसीसी टेबुल हुने दिन विरामी भएका र पछि छलफल हुने भनिएको दिन संसद छल्न भागेर काठमाडौँ छोडेका अर्थमन्त्री जनार्दन शर्माले एमसीसी पारित हुने दिन उनकै प्रस्तावमा एमसीसी बारे छलफल प्रस्ताव संसदमा आयो ,उनकै प्रस्तावमा एमसीसी पारित भयो । प्रचण्डहरुले हात उठाएर हामी एमसीसी पक्षमा छौँ भनेर पारित गराए ।

सडकमा कार्यकर्ता उरालेर एमसीसीको चर्को विरोध गराएका प्रचण्ड अन्तत व्याख्यात्मक घोषणा हुनु पनी ठूलो उपलव्धी हो भनेर कार्यकर्तालाई कन्भिन्स गर्न थालेका छन् । एमसीसीका सन्दर्भमा माओवादी केन्द्र र सो पार्टीका अध्यक्ष प्रचण्डले देखाएको छिर्केमिर्के चरित्रको साइड इफेक्ट देखिन थालेको छ । देशभरका माओवादी कार्यकर्ताहरुले पार्टी छोडेको घोषणा गर्न थालेका छन् ।

अन्तयन्तै गिजोलिएको एमसीसी पारित भए सँग एउटा च्याप्टरको अन्त्य भएको छ । माओवादी केन्द्र बाटै अर्थमन्त्री भएका जनार्दन शर्माको प्रस्तावमा , माओवादी केन्द्रकै कोटा बाट सभामुख भएका अग्नी प्रसाद सापकोटाको मुख बाट एमसीसी पारित भएको घोषणा भएको छ । माओवादी केन्द्रकै अध्यक्ष प्रचण्ड सहितका सांसदहरुले हात उठाएर एमसीसी अुनुमोदन भएको छ । पूर्व प्रधानमन्त्री डा बावुराम भट्टराईकै भाषामा प्रचण्डहरुको लाज ढाक्न व्याख्यात्मक घोषणा नामको पातलो लगौटी भने झुण्डिएकै छ ।