माधव नेपाललाई लाजले भुतुक्कै हुने गरि झलनाथ खनालले हाने झटारो !

आफ्नो पार्टीको अस्तित्वनै समाप्त पार्न खोज्नेहरुको षड्यन्त्र एमसीसीको पक्षमा उभिएर चुड्किको भरमा असफल पारेको दाबी गरिरहेका नेकपा एसका अध्यक्ष माधव कुमार नेपाललाई उनकै पार्टीका नेता झलनाथ खनालले काउन्टर दिएका छन् ।

एमसीसी पारित गर्ने बेला संसद बैठकनै बहिस्कार गरेर हिँडेका नेकपा एसका नेता झलनाथ खनालले व्याख्यात्मक घोषणाको कुनै औचित्य नभएको र एमसीसीमा आफ्नो विरोध कायम भएको प्रष्ट पारेका छन् । व्याख्यात्मक घोषणा गरेर ठिक गरेका छौँ भनेर दंग परिरहेका पार्टी अध्यक्ष माधव नेपाल समेतलाई खनालले स्वादिलो जवाफ दिएका छन् ।

खनालले अमेरिकी सहयोग परियोजना एमसीसी पास गर्दा गरिएको व्याख्यात्मक टिप्पणीलाई न्यानो थाङ्नोको टिप्पणी गरेका छन् ।बिहीबार विराटनगर विमानस्थलमा पत्रकारसँग कुरा गर्दै उनले व्याख्यात्मक टिप्पणीको अर्थ नरहेको बताए ।

‘व्याख्यात्मक टिप्पणी न्यानो थाङ्नोबाहेक केही होइन’ उनले भने, ‘नेपालका नेताहरु आनन्दपूर्वक सुतुन् भनेर बनाइएको थाङ्नो हो, त्यो थाङ्नोमा अहिले साथीहरु सुत्नुभएको छ ।’

उनले विधि प्रक्रिया विपरीत एमसीसी पास गरेको गुनासो गरे । प्रक्रिया नमिलाई एमसीसी पास गर्नु देशका लागि लज्जास्पद भएको बताउँदै उनले एमसीसी पारित गर्दाको परिणाम विस्तारै देखिने बताए ।

विराटनगरमा बुधबार आयोजित भरतमोहन अधिकारीको तेस्रो स्मृति दिवस तथा जेष्ठ नागरिक आधारभूत तथा प्रविधिमूलक शिक्षा कार्यक्रमको उद्घाटन समारोहमा बोल्दै खनालले यस्तो बताएका हुन् ।

खनालले रुस र युक्रेन युद्धमा नेपालले युक्रेनको पक्ष लिएकोमा पनि आपत्ती जनाएका छन् । उनले प्रधानमन्त्री शेरबहादुर देउवा ‘अमेरिकी शिविरमा जान लागेको हो ?’ भन्ने प्रश्न समेत गरेका छन् । रुस–युक्रेन द्वन्द्वका क्रममा नेपाल युक्रेनको पक्षमा खुलेको प्रसंग कोट्याउँदै खनालले प्रधानमन्त्रीको आलोचना गरेका हुन् ।

खनालले अमेरिकाले आयोजना गरेको डेमोक्र्याटिक समिटमा प्रधानमन्त्री देउवा सहभागी भएको विषयमा पनि असन्तुष्टि व्यक्त गरे । ‘यो डेमोक्र्याटिक समिट भनेको तथाकथित अमेरिकी एलिटहरुको हो,’ खनालले भने, ‘डेमोक्रेटिक समिटमा हाम्रो प्रधानमन्त्री किन सहभागी हुनुभएको हो ? उहाँ के अमेरिकी शिविरको मान्छे हो ?यो मेरो प्रश्न हो ।’

नेपाल जस्तो असंलग्न पराराष्ट्र नीति लिएको राष्ट्रका कार्यकारी प्रमुखले यस्तो गर्न नहुने बताउँदै खनालले नेपालले युक्रेनको घटनाबाट पनि पाठ सिक्नु जरुरी रहेको बताए । ‘युक्रेनको घटनाले छिमेकीलाई चिढ्याउनु हुँदैन भन्ने पाठ हो । तर, सरकारले किन हतार हतार समर्थन गरेको ? युक्रेन घटना पश्चिमाको उक्साहटले भएको हो । हतारमा नेपालले किन समर्थन गरेको ? यो कता जाने बाटो हो ? यो नेपालको असन्तुलित कुटनीति हो,’ उनले भने, ‘नेपाल के अमेरिकी शिविरमा ढल्किएको हो ?’ यो प्रश्नको जवाफ प्रधानमन्त्री शेरबहादुर देउवाले दिनुपर्ने खनालले बताए ।

खनालले भारत र चीनजस्ता मुलुकसमेत तटस्थ भूमिका खेलिरहेको अहिलेको अवस्थामा नेपाल जस्तो मुलुकले हतारमा टाढाको मुलुकको विषयमा प्रतिक्रिया दिनु राम्रो नभएको बताए । खनालले ५ सय वर्षदेखिको पश्चिमाको दबदबा अब अन्त्य हुँदै गएको टिप्पणी पनि गरे ।

‘अमेरिका पछाडि हटिरहेको छ, कमेडियन राष्ट्रपतिलाई उचाल्यो तर अमेरिकाले केही गर्न सक्दैन,’ खनालले भने, ‘अफगानिस्तानमा के भयो ? अमेरिका भागेको होइन ?युक्रेनमा उक्साएर भागेको होइन ? ’ यो कुरालाई ध्यान दिएर मात्रै नेपाल अगाडि बढ्नुपर्ने उनले बताए ।