प्रचण्डलाई बल्ल याद आयो जनयुद्धका घाइते र लडाकुको !

स्थानिय तहको निर्वाचनको मिती नजिकै आइरहेका बेला सत्तागठबन्धन दल नेपाली काग्रेसका नेताहरुले सार्वजनिक रुपले भिखारी भनेर खनिन थाले पछि नेकपा माओवादी केन्द्रका अध्यक्ष पुष्पकमल दहाल प्रचण्डले जनयुद्धका घाइते र लडाकुहरुको याद गर्न थालेका छन् ।

केहि दिन अघि माओवादी लडाकुको जीवनमा आधारित पीर गित प्रकाश सपूतले निकालेका थिए । परिवर्तनका लागी लडेका योद्धाहरुको वर्तमान अवस्था देखाइएको गितको माओवादी कार्यकर्ताले विरोध गरेका थिए । अहिले प्रचण्डले उनीहरुको खोजि गर्न थालेका छन् ।

प्रचण्डले जनयुद्धमा घाइतले कार्यकर्तालाई हस्पिटलमै पुगेर भेट्ने देखि द्धन्द्धकालिन बिषयमा प्रधानमन्त्री शेरबहादुर देउवालाई ध्यानाकर्षणपत्र बुझाउँने काम सम्म गरेका छन् । चुनाव आउँदै गर्दा प्रचण्डले चलाखीपूर्वक यो कार्ड खेलेको अनुमान गरिएको छ ।

अध्यक्ष प्रचण्ड जनयुद्धका घाइते पूर्व जनमुक्ति सेना भक्त राना मगरलाई भेट्न वीर अस्पताल पुगेका छन् । स्वास्थ्यमा समस्या देखिएपछि राना उपचारका लागि वीर अस्पताल भर्ना भएका हुन ।

अध्यक्ष प्रचण्डले उनको स्वास्थ्य अवस्थाबारे चिकित्सकहरुसँग परामर्श गर्नुका साथै आवश्यक सहयोग गर्ने प्रतिबद्धता समेत व्यक्त गरे ।राना काभ्रेको महाभारत गाउँपालिका निवासी हुन् ।

मकवानपुरको झुरझुरेमा घाइते भएका राना शान्ति प्रक्रिया पछि वाइसीएलको जिम्मेवारीमा रहि काम गर्दै आएका थिए । टाउकोमा लागेको चोट बल्झिएपछि उनको खुट्टामा इन्फेक्सन देखिएको र त्यसको कारण दुबै खुट्टा अप्रेसन गरेर फाल्नु परेको अस्पतालले जनाएको छ।राना मगरको ७वर्षको बच्चाको पढाई र श्रीमतीका लागि रोजगारीको लागि पहल गर्ने प्रचण्डले आश्वासन दिएका छन्।

त्यसैगरि आजनै प्रचण्डले माओवादी जनयुद्धलगायत विभिन्न आन्दोलनमा ज्यान गुमाएका सहिद परिवारलाई मासिक जीवन निर्बाह भत्ता उपलब्ध गराउने पूरक बजेटको व्यवस्थालाई यथाशीघ्र कार्यन्वयन गर्न प्रधानमन्त्रीको ध्यानाकर्षण गराएका छन् ।

आज बिहान प्रधानमन्त्रीनिवास बालुवाटारमा भएको छलफलमा माओवादी युद्धका घाइते तथा अपांग योद्दाहरुको सन्दर्भमा बुँदागत रुपमा ध्यानाकर्षण गराएको प्रचण्डका स्वकीय सचिव समेत रहेका माओवादी नेता रमेश मल्लले जानकारी दिएका छन् ।

उनका अनुसार प्रचण्डले देउवासमक्ष विभिन्न पाँच बुँदामा ध्यानाकर्षण गराएका छन् । जसमा सशस्त्र द्वन्द्वमा घाइते भइ अपांगता भएका व्यक्तिको अपांगता प्रतिशत निर्धारण कार्यविधि संशोधन हुनुपर्ने, छुटेका घाइते तथा अपांगता भएका व्यक्तिहरुलाई सूचीकृत गर्ने, उनीरुलाई सुविधासहित गणतान्त्रिक सेनानीको परिचयपत्र र सम्मानपत्र वितरण गर्ने लगायतका विषय छन् ।