आरजुलाई माननीयको फूली लगाउँन काग्रेस कार्यकर्तालाई हसिँया हथौडामा भोट हाल्न लगाउँनुपर्ने देउवाको बाध्यता !

पछिल्लो समय प्रधानमन्त्री एवं नेपाली काग्रेसका सभापती शेरबहादुर देउवाले आगामी निर्वाचनमा प्रचण्ड र माधव नेपालसँग गठबन्धन गर्नु पर्ने आवाज जोडतोडले उठाइरहेका छन् ।

अघिल्लो चुनावमा काग्रेसका धेरै नेताले चुनाव हारेको , आफुले समेत बल्लतल्ल चुनाव जितेको , प्रचण्डले हार्ने चुनाव लड्दैनन् काग्रेसले नबोक्ने हो भने एमालेसँग मिल्न सक्छन् जस्ता तर्क गरेर देउवाले गठबन्धनको आवश्यकता बारे बोलीरहेका छन् । बाहिर यस्ता कुरा गरे पनि गठबन्धन गर्नै पर्ने देउवाको बाध्यता भने अर्कै भएको खुलासा भएको छ ।

देउवा जस्ता संसदीय राजनितीका चुतर खेलाडीलाई गबठन्धन गर्नु पर्ने धेरै कारण हुन सक्छन् ती मध्ये प्रमुख कारण भने श्रीमती आरजु राणाको दबाव पनि एक भएको बताइन्छ । अघिल्लो निर्वाचनमा कैलालीमा एमालेका उमेदवार नारदमुनी रानासँग नमज्जा सँग पराजित भएकी आरजुले यस पटक जसरी पनि गठबन्धनमै चुनाव गर्न आफ्ना श्रीमान देउवालाई दबाव दिने गरेको स्रोतको दाबी छ ।

पछिल्लो समय देउवाका श्रीमान श्रीमतीको एउटै स्वर सुनिन थालेको छ । केहि दिन अघि मात्रै कैलाली पुगेर देउवा पत्नी आरजुले गठबन्धन नगर्ने हो भने एमालेसँग प्रतिष्पर्धा गर्न कठिन हुने भन्दै गठबन्धनमै निर्वाचन हुने र आफु फेरी पनि कैलालीबाटै प्रतिष्पर्धा गर्ने बताएकी थिइन् ।

श्रीमतीको दबावमा रहेका प्रधानमन्त्री शेरबहादुर देउवा, वरिष्ठ नेता रामचन्द्र पौडेल लगायतका नेताहरु चुनावी गठबन्धनको पक्षमा छन् भने गगन थापा, डा।शेखर कोइराला लगायतका नेताहरु गठबन्धन गर्न नहुने पक्षमा छन् । गठबन्धन नगरे कांग्रेसको हालत खराब हुने बुझाई प्रधानमन्त्री देउवा र वरिष्ठ नेता रामचन्द्र पौडेल लगायतको छ भने गठबन्धन गर्दा कांग्रेसलाई दीर्घकालिन रुपमा घाटा हुने बुझाई गगन थापा र डा।शेखर कोइरालाहरुको छ ।

गठबन्धन नगरी चुनावमा जाँदा एमाले र ओलीले खर्लप्पै पार्ने डरले देउवा र रामचन्द्र पौडेलहरुमा घर गरेको छ । अहिले सत्तामा रहेका सहयात्री दलहरु माओवादी केन्द्र, नेकपा एकीकृत समाजवादी लगायतसँग चुनावी गठबन्धन नगरे ती दलसँग उल्टै ओलीले गठबन्धन गर्ने देउवाको बुझाई छ । अहिले गठबन्धन नगरी चुनावमा जाँदा कम्युनिष्ट शक्तिहरु फेरि मिल्न सक्ने र कम्युनिष्टहरु मिलेको खण्डमा कांग्रेसको हालत अघिल्लो संसदीय निर्वाचनको झैं हुने डर प्रधानमन्त्री सहितका केही नेताहरुमा छ ।

अघिल्लो पटक चुनावमा पराजित भएका कांग्रेसका अधिकांश नेताहरु गठबन्धनका पक्षमा छन् । ता कि अन्य दलहरुको वैशाखी टेकेर भएपनि चुनाव जित्न सकियोस् र सांसद बन्न पाइयोस् । रामचन्द्र पौडेल अघिल्लो पटकको संसदीय निर्वाचनमा पराजित भएका नेता हुन् । गठबन्धन गरिएन भने यसपटक पनि चुनाव जितिँदैन भन्ने डर उनमा छ । प्रधानमन्त्री शेरबहादुर देउवालाई गठबन्धन नगर्दा व्यक्तिगत रुपमा आफूले डँडेल्धुराबाट चुनाव हार्छु भन्ने डर त नहोला तर, श्रीमति आरजु राणाको ठूलो चिन्ता छ । कैलालीबाट चुनाव लड्ने रहर गरेकी श्रीमति आरजु राणा फेरी पछारिने हुन् कि भन्ने चिन्ता प्रधानमन्त्री देउवामा देखिन्छ । श्रीमतिलाई जिताउँनका लागि नै भएपनि गठबन्धन गर्नपर्ने दबाबमा देउवा देखिन्छन् भने आफूले जित्नका लागि पनि गठबन्धन गर्नपर्ने लाइनमा वरिष्ठ नेता रामचन्द्र पौडेल देखिन्छन् ।

गगन थापा र डा।शेखर कोइरालाहरु तुलनात्मक रुपमा आफू सुरक्षित रहेको महसुस गरिररहेका छन् । त्यहीभएर उनीहरु गठबन्धनका पक्षमा छैनन् । आफूहरुको अबस्था पनि रामचन्द्र पौडेल र आरजु राणाहरुको जस्तै भएको अनुभूति गगन थापा र शेखर कोइरालाहरुलाई हुन्थ्यो भने सम्भवतः उनीहरु पनि गठबन्धनकै पक्षमा देखिन्थे । कांग्रेसका दुई महामन्त्री मध्ये गगन थापा गठबन्धनका विपक्षमा र विश्वप्रकाश शर्मा गठबन्धनका पक्षमा देखिनुलाई धेरैले नीजि स्वार्थका रुपमा लिएका छन् । संसदीय चुनावमा झापामा हारेका विश्वप्रकाश शर्मा गठबन्धन बेगर चुनाव लड्दा हारिने हो कि भन्ने डरमा छन् । कांग्रेसका माथिल्लो तहकै एक नेता भन्छन्, कांग्रेसका अधिकांश नेताहरुलाई भोलिको कांग्रेसको होइन अहिलेको आफ्नो अबस्थाको पिर छ ।