आज हुँदैछ जनादेश र परमादेश विचको फैसला !

प्रमुख प्रतिपक्षी दल नेकपा एमालेका अध्यक्ष केपी ओलीले आगामी निर्वाचन जनादेश र परमादेश विचको जनमत संग्रहका रुपमा हुन लागेको भनेर लिखित प्रतिवेदननै एमाले केन्द्रिय किमिटी बैठकमा पेस गरेका थिए । जनादेश र परमादेश विचको विचको मिनी प्रयोग आज हुँदैछ ।

पछिल्लो समय देशमा हरेक खालका निर्वाचनमा एमाले भर्सेस देउवालाई परमादेशबाट प्रधानमन्त्री बनाउँने पाँचदलका विचमा हुँदै आएको छ । पत्रकार महासंघको निर्वाचन देखी राष्ट्रिय सभाको निर्वाचन सम्म एमाले एकातिर र गठबन्धन अर्कोतिर स्पष्ट देखिँदै आएको छ । यस्तै अर्को एक प्रयोग आज हुँदैछ ।

वकिलहरुको संस्था नेपाल बार एसोसिएसनको नयाँ नेतृत्व चयनका लागी आज मतदान हुँदैछ । बारको चुनावमा पनि एमाले एकातिर र गठबन्धन अर्को तिर हुने भएका छन् । देउवालाई परमादेशबाट प्रधानमन्त्री बनाउँनु पर्छ भन्ने वकिलहरु एकातिर र तत्कालिन प्रधानमन्त्री केपी ओलीले गरेको जनादेशमा जाने निर्णय ठिक भन्ने वलिकहरु अर्कोतिर रहेर प्रतिष्पर्धा गर्दैछन् ।

नेपालबार एसोसिएसनको आजको निर्वाचनलाई जनादेश र परमादेश विचको फैसलाका रुपमा पनि कतिपयले अर्थाएका छन् । राष्ट्रिय राजनितीलाईनै प्रभाव पार्न सक्ने बारको आज हुन लागेको निर्वाचनलाई निकै अर्थपुर्ण रुपमा हेरिएको छ । दुवै पक्षले आफुले निर्वाचन जित्ने दाबी सहित चुनावी मैदानमा उत्रिएका छन् ।

चुनावमा सत्तारुढ पाँच दलीय गठबन्धनबाट नेपाली कांग्रेसनिकट डेमोक्रेटिक लयर्स एशोसिएशन (डीएलए)का गोपालकृष्ण घिमिरे नेतृत्वको प्यानलसँग एमालेनिकट प्रगतिशील तथा पेशागत कानून व्यवसायी समूह (पीपीएलए)का विष्णुमणि अधिकारीको प्यानल भिड्दैछ ।

सत्तारुढ गठबन्धनबाट घिमिरे नेपाली कांग्रेसनिकट डेमोक्रेटिक लयर्स एशोसिएशन (डीएलए) का पूर्वअध्यक्ष पनि हुन् । उनी कांग्रेसको १४औं महाधिवेशन केन्द्रीय निर्वाचन समितिका संयोजक समेत हुन् ।

त्यस्तै उक्त गठबन्धनले महासचिवमा अन्जिता खनाललाई अघि सारेको छ । खनाल नेकपा माओवादी केन्द्रबाट उम्मेदवार बनेकी हुन् । यसअघि महासचिवमा दिनमणि पोखरेललाई प्रस्ताव गरिए पनि गठबन्धनप्रति असन्तुष्टि जनाउँदै पोखरेल पछि हटेका थिए । वागमतीबाट उपाध्यक्षमा नेकपा एसका हर्क रावलले उम्मेदवारी दिँदैछन् ।अध्यक्षसहित १५ पद कांग्रेसलाई साथै उपाध्यक्ष, महासचिवसहित पद गठबन्धनका अन्य घटकलाई भागबण्डा गरिएको छ ।

पीपीएलएले भने विष्णुमणि अधिकारीको नेतृत्वमा प्यानल घोषणा गरेको छ । उक्त प्यानलबाट महासचिव पदमा अधिवक्ता केदारप्रसाद कोइराला भिड्दैछन् ।सो समूहबाट उपाध्यक्षमा प्रदेश १ बाट रोहितकुमार डाँगी, मधेश प्रदेशबाट केशव प्रसाद दास, बागमतीबाट डिल्लीराम मैनाली, गण्डकीबाट भुपेन्द्र खनाल, लुम्बिनीबाट बासुदेव ज्ञवाली, कर्णालीबाट चंखबहादुर साउद र महिला उपाध्यक्षमा रमा श्रेष्ठ उम्मेदवार छन् । कोषाध्यक्षमा जगतबहादुर कार्की प्रतिस्पर्धामा उत्रिएका छन् ।

पीपीएलएबाट सदस्य पदमा कुन्जनी परियार प्यासी, नरसिंह चौधरी थारु, सुभाचन्द्र झा, शशी कुमारी श्रेष्ठ, दिलकुमारी राई, इन्दिरा आचार्य, मनिका खड्का, गणेशबहादुर ओली, कुवेर घिमिरे, तारा कुमार श्रेष्ठ, युवक कुमार गौतम, अर्जुन खड्का, अनिल कुमार श्रेष्ठ र हरि प्रसाद पंगेनी प्रतिस्पर्धामा छन् ।

यसै विच नेपाल बार एशोसिएशनका पूर्व उपाध्यक्ष टिकाराम भट्टराईले बारको चुनावमा सरकारले बालुवाटारबाट उम्मेदवारलाई टिका लगाएर मण्डलेकरण गरेको आरोप लगाएका छन् ।

प्रगतिशील पेशागत कानून व्यवसायी समूहका उम्मेदवारको पक्षमा मत माग्दै भट्टराईले यस पटक बार एशोसिएशनको चुनाव हेर्दा कानून व्यवसायीबीच देखिए पनि यथार्थमा सरकारसँग आफूहरूले चुनाव लडिरहेको बताए । उनले बालुवाटारमा सत्ता गठबन्धनले उम्मेदवार तय गरेर पठाएकाले कानून व्यवसायीले सरकारसँग प्रतिस्पर्धा गरिरहेको बताए ।

भट्टराईले भने– नेपाल बारको निर्वाचनमा कानून व्यवसायी नै मतदाता र उम्मेदवार छन् । यथार्थमा यो चुनाव हामी सरकारसँग लड्दैछौं । नेपाल बारको स्थापनादेखि बार सधैँ प्रतिपक्षको भूमिका थियो । तर यसपालि प्रतिस्पर्धी समूहको उम्मेदवारी बालुवाटारमा भयो र प्रधानमन्त्री निवासमा टिका लाएर मैदानमा आउनुभयो । यो चुनाव सरकारविरुद्धको चुनाव हो । हामी सिङ्गै सरकारसँग चुनाव लडिरहेका छौँ ।

भट्टराईले पीपीएलका अध्यक्ष उम्मेदवार बारको ७४ दिनको आन्दोलनमा अधिकांश समय सहभागी भए पनि विपक्षी गठबन्धनका अध्यक्षका उम्मेदवारलाई एक दिन पनि आन्दोलनमा नदेखिएको टिप्पणी गरे ।