घनश्याम भुषालहरुका नाममा ओलीको ठाडो निर्देशन

नेकपा एमालेका अध्यक्ष केपी ओलीले नेकपा एमालेमा बसेर एमालेले गरेका काममा बारेमा नराम्रो कुरा बोल्दै नहिड्न निर्देशन दिएका छन् ।

पार्टीका नेता घनश्याम भुषाल लगायतले अहिले पनि तत्कालिन प्रधानमन्त्री केपी ओलीले गरेको संसद विघठन गलत थियो भनेर पटक पटक बहस गरिरहेको प्रति लक्षित गर्दै ओलीले कडा निर्देशन दिएका छन् । कुनै पनि एमाले कार्यकर्ताले संसद विघठन गलत थियो भन्ने शब्द बोल्दै नबोल्न ओलीले भनेका छन् ।

देश र पार्टी गलत तत्वहररुको कब्जामा जाने अवस्था आए पछि बाध्य भएर संसद विघठन गरिएको भन्दै ओलीले यदि संसद विघठन नगरेको भए अहिले एमालेसँग सुर्य पनि नरहने र पार्टी पनि प्रमुख राजनितीक शक्ति को रुपमा नरहने थियो भन्दै संसद विघठन गरेर जनतामा जाने निर्णय विल्कुल जायज भएको दाबी गरेका छन् ।

उनले विगतमा तराईमा एमालेलाई प्रवेश निषेध गरिएको उल्लेख गर्दै अहिले तराई, मधेशमा एमालेको लहर आएको बताए। मधेश प्रदेश एमालेको मजबुद गढ बनेको उनले दाबी गरे। अध्यक्ष ओलीले स्थानीय तह निर्वाचनमा एमालेले बहुमत ल्याउने जिकिरसमेत गरे।

‘हामी बहुमत ल्याउन सक्छौं। अघिल्लो निर्वाचनमा पनि हामी सरकारमा थिएनौं। तर हामीले परिणाम राम्रो ल्याएको थियौं। तराईमा हामीलाई प्रवेश गर्न दिइएको थिएन। यसपल्ट तराईमा एमालेलाई मात्र जनताले स्वागत गर्छन्’, उनले भने, ‘मधेशमा अहिले एमालेको लहर आएको छ। एउटा प्रदेशमै प्रवेश निषेध थियो एमालेलाई भने आज त्यो प्रदेश एमालेको सबभन्दा मजबुद गढको रुपमा अगाडि आइराखेको छ।’

अध्यक्ष ओलीले तत्कालिन नेपाल कम्युनिष्ट पार्टी (नेकपा) कब्जा गर्ने षड्यन्त्र समाप्त पार्न आफूले प्रतिनिधि सभा विघटन गर्नुपरेको बताए। प्रचण्ड, माधव नेपालहरूले संगठन कब्जामा लिइसकेकाले कार्यकर्तामा अपिल गर्न जानुको विकल्प आफूसँग नरहेको उनले स्पष्ट पारे।

‘पार्टी कब्जा गर्ने षड्यन्त्र समाप्त पार्न प्रतिनिधि सभा विघटन गरेर संगठन सुदृढ गर्नुपर्‍यो, संगठन त षड्यन्त्रकारीहरुले कब्जामा लिइसके। त्यस्तो अवस्थामा कार्यकर्तामा अपिल गर्न जानबाहेक अर्को उपाय रहेन’, उनले भने, ‘त्यसकारण प्रतिनिधि सभाको विघटन गरि जनतामा ताजा जनादेशका लागि जाने निर्णय गरेँ। जुन एकदम जायज हो।’

उनले पाँच दलीय गठबन्धनले झापामा राप्रपालाई साझा उम्मेदवार बनाएकाले अब यो गठबन्धन ६ दलीय गठबन्धन बनेको बताए। अहिले पाँच दलीय गठबन्धन ६ दलीय भएको छ। अब त राजावादी राप्रपासँग पनि उनीहरुको गठबन्धन भइसक्यो र झापाको मेरै निर्वाचन क्षेत्रमा राजावादी राप्रपाको उम्मेदवारलाई कांग्रेस, माकुने, प्रचण्ड सबै गुटहरुले साझा उम्मेदवारको रुपमा मानेर एमाले विरुद्ध आइनै सके’, उनले भने, ‘त्यसकारण यो पाँचदलीय होइन ६ दलीय गठबन्धन भइसक्यो। हिजो जुन परोक्ष रुपमा त्यो गठबन्धन थियो पार्टी फुटाउन त्यस विरूद्ध हामीले ताजा जनादेशमा जान फैसला गर्‍यौं। अदालतले हामीलाई हराइदियो।’

उनले एमालेको सूर्य चिन्ह सिध्याउँछु भनेर खान खोज्नेको थुतुनो जलेको टिप्पणी गरे। तत्कालिन नेकपामा प्रचण्डले आफूलाई पार्टीबाट निष्काशन गरी मुद्दा चलाएर थुन्ने योजनाका साथमा १९ पृष्ठ लामो अभियोग पत्र ल्याएको बताए।

‘एमालेको सूर्य सिध्याउँछु भनेर कुदेकाहरुको थुतुनो आज डढिराखेको छ। गत वर्ष एउटा डरलाग्दो षड्यन्त्र भयो। १९ पृष्ठ लामो पार्टी अध्यक्षका विरुद्ध फौजदारी आरोपसहित अभियोगपत्र अगाडि बढाइयो’, उनले भने, ‘यो ठूलो षड्यन्त्र थियो। त्यस अभियोग पत्रबाट के योजना थियो भने पार्टीबाट निष्काशन गर्ने र मुद्दा चलाएर थुन्ने योजना थियो।’