अर्घाखाँचीमा देखियो टोपबहादुरको पावर , क्लिनस्विप पार्छु भन्ने गठबन्धनको हरिबिजोग !

देशैभरको स्थानिय तहको निर्वाचनको मत परिणाम आइरहेका बेला नेकपा एमालेका सचिव टोपबहादुर रायमाझीको गृहजिल्ला अर्घाखाँचीमा एमालेले गठबन्धनलाई आफ्नो पावर देखाएको छ ।
रायमाझीको अगुवाइमा एमालेले चमात्कारिक परिणाम निकालेको छ ।

निर्वाचन अघि देशव्यापी रुपमा गठबन्धन गर्ने की नगर्ने भनेर गठबन्धनका केन्द्रिय नेताहरु विभाजित भएकै अवस्थामा अर्घाखाँचीमा भने गठबन्धनका नेताहरुले एमालेलाई यस निर्वाचनमा क्लिनस्विप पार्ने भन्दै सबै पालिका सहित ६१ वटा वडामानै जित्ने दाबी सहित निर्वाचनमा गठबन्धनको घोषणा गरेका थिए तर परिणामले एमालेले सानदार जित निकाल्न सफल भएको छ भने गठबन्धनको हरिबिजोग भएको छ ।

पुर्व माओवादी पृष्ठभूमिबाट एमाले बनेका सचिव रायमाझीले एमाले र आफ्ना विरुद्ध लक्षित गरेर पाँच दलले घेराबन्दी गरे पछि अर्घाखाँचीनै बसेर पाँच दलीय गठबन्धनको घेराबन्दी तोड्दै अर्घाखाँचीमा एमालेलाई सानदार बिजयी गराएका छन् अहिले उनको चर्चा देशव्यापी भइरहेको छ ।

यसअघि गठबन्धनले जितेको सदरमुकामको सन्धिखर्क नगरपालिका प्रमुख र उपप्रमुखमा एमाले उम्मेदवार विजयी भएका छन् । नगरप्रमुखमा एमालेका कृष्णप्रसाद श्रेष्ठले गठबन्धनको तर्फबाट कांग्रेसकी शान्ता भण्डारीलाई १ हजार ८ सय १ मतान्तरले पराजित गरे । श्रेष्ठले ११ हजार १ सय ३५ मत ल्याएर सन्धिखर्क नगरपालिका प्रमुखमा निर्वाचित भए । भण्डारीले ९ हजार ३ सय ३४ मत ल्याइन् ।

उपप्रमुखमा एमालेकी मिश्रा आचार्यले गठबन्धनको तर्फबाट माओवादीका राजेन्द्र भुसाललाई ४ सय ७८ मतान्तरले पराजित गरिन् । आचार्यले ९ हजार ६ सय ४६ मत ल्याएर विजयी भइन् । भुसालले ९ हजार १ सय ६८ मत ल्याए ।

२०७४ को स्थानीय तह निर्वाचनमा पनि श्रेष्ठ नगर प्रमुखमा उम्मेदवार थिए । त्यतिबेला कांग्रेस–माओवादीको चुनावी तालमेलमा कांग्रेसका कमलप्रसाद भुसालसँग ११ सय ३ मतान्तरले श्रेष्ठ पराजित भएका थिए । दोस्रो पटकमा श्रेष्ठ फराकिलो मतान्तरले विजयी भए ।

निर्वाचित श्रेष्ठको पार्टी एमालेले नगरको १२ वटा वडामध्ये वडा २, ६, ७ र ९ वडा अध्यक्षमा जित हासिल गरेको छ । माओवादीले वडा १० र कांग्रेसले वडा १, ३, ४, ५, ८, ११ र १२ वडा अध्यक्ष जितेको छ ।

सन्धिखर्क टोपबहादुर रायमाझीको घर भएको नगरपालिका हो । रायमाझीसँगै कांग्रेसका केन्द्रीय सदस्य एवं संघीय संसदीय दलकी सचेतक पुष्पा भुसाल, केन्द्रीय सदस्य मानबहादुर विश्वकर्मा, पूर्वकेन्द्रीय सदस्य रेवतीप्रसाद भुसाल, माओवादी केन्द्रका नेता डिलाराम आचार्यको जन्मघर यही‌ हो । सबै नेताको घर ९ नम्बर वडामा पर्छ । उक्त वडा पनि एमालेले जितेको छ ।

एमालेले पाणिनि, मालारानी गाउँपालिका र सन्धिखर्क नगरपालिकामा दुवै पद जितेको हो । भूमिकास्थान नगरपालिकाको उपाध्यक्ष र छत्रदेव गाउँपालिकामा पनि उपाध्यक्ष पद जितेको छ । यी दुवै पालिकाको प्रमुखमा थोरै मतले मात्र एमालेका उम्मेदार पराजित भएका छन् ।

२०७४ को स्थानीय तह निर्वाचनमा ४ पालिकामध्ये पाणिनिमा अध्यक्ष, छत्रदेवमा दुवै पद, शितगंगा र सन्धिखर्क नगरमा प्रमुख र भूमिकास्थान नगरमा उपप्रमुख पद जितेको कांग्रेसले यसपालि शितगंगा नगरपालिकाको अध्यक्ष, छत्रदेव गाउँपालिकाको अध्यक्ष पद मात्रै जितेको छ ।

भूमिकास्थान नगरप्रमुखमा राजमो र माओवादीले जितेको छ । २०७४ मा एमालेले मालारानी गाउँपालिकाका दुवै पद र पाणिनिको उपाध्यक्ष पद जितेको थियो । एमालेबाट पाणिनिको उपाध्यक्षमा निर्वाचित लक्ष्मी गौतम केही महिनाअघि कांग्रेसमा प्रवेश गरेकी थिइन । कांग्रेसले उनै गौतमलाई पुनः उपाध्यक्ष पदमा उम्मेदवार बनाएको थियो । एमालेकी नर्मदा पौडेलसँग पराजित भइन् ।