यस्तो छ अफ्गानिस्तानको हालको अबस्था

अफगानिस्तानको राजधानी शहर काबुलमा तालिबानका लडाकु छिरेसँगै राष्ट्रपति असर्फ घानीले आपतकालीन बैठक बोलाएका छन् । अन्तर्राष्ट्रिय सञ्चारमाध्यमका अनुसार उनले अहिले अमेरिकी विशेष दूत जाल्मे खलिलजाद र शीर्ष नेटोका अधिकारीसँग वार्ता गरिरहेका छन् । यसअघि शनिबार घानीले एक वक्तव्य जारी गर्दै मुलुक गम्भीर खतरामा रहेको बताएका थिए ।

रोयटर्सले उच्च अधिकारीहरुलाई उद्वृत गर्दै तालिवानी लडाकु चारैतिरबाट काबुलमा प्रवेश गरिरहेको जनाएको छ । तर विस्तृत विवरण दिइएको छैन । कावुलको वरपर विभिन्न स्थानमा गोली चलेको आवाजहरु सुनिएका छन् । तर, अहिलेसम्म राजधानी शहर सुरक्षा फौजकै कब्जामा रहेको जनाइएको छ । अमेरिकी अधिकारीहरुले आफ्नो दूतावासका कर्मचारीहरुलाई हेलिकोप्टरबाट उठाएर एयरपोर्टतर्फ लगेको जनाएका छन् । तालिवानका एक अधिकारीले रोयटर्सलाई आफूहरुले हताहति नचाहेको बताएका छन् । तर, अहिलेसम्म उसले युद्धविरामको घोषणा गरेको छैन ।

राष्ट्रपति अस्रफ घानीले शनिबार आफू स्थानीय नेता तथा अन्तर्राष्ट्रिय साझेदारहरुसँग परिस्थितिको विषयमा परामर्श गरिरहेको बताएका थिए । त्यसयता उनको कुनै थप बयान आएको छैन । आइतबार बिहानै लडाकुहरुले कुनै मुठभेडबिना जलालबादको पूर्वी शहर कब्जा गरे । यसले भूपरिवेष्ठित देशको एउटा मूख्य राजमार्गमा उनीहरुको नियन्त्रण कायम भएको छ । उनीहरुले पाकिस्तानसँग जोडिएको तोर्खाम सीमा नजिक पनि उनीहरुले कब्जा जमाएका छन् । अब अफगान सरकारको नियन्त्रणमा काबुल बिमानस्थल मात्र छ, जहाँबाट बाहिर जान सकिन्छ ।

नेपाल सरकारले आफ्ना नागरिकको उद्धारका लागि कुनै पहल वा निर्णय गरिसकेको छैन । त्यहीकारण विदेशीको भर पर्नुबाहेक अर्को विकल्प पनि नेपालीसामु देखिँदैन ।
‘यहाँ आफ्ना कर्मचारीहरुलाई विदेशी निकायले धमाधम लैजान थालेका छन् । सडक सञ्जालबाट लैजाँदा जोखिम हुन्छ भन्दै उनीहरुले कार्यस्थलमै हेलिकप्टर ल्याउने गरेका छन्,’ काबुलस्थित जर्मनी दूतावासमा कार्यरत एक नेपालीले भने, ‘एयरपोर्टबाट ५–१० मिनेट टाढा रहेका ठाउँमा पनि हेलिकोप्टर ल्याइन्छ र एयर लिफ्टिङ गरी विमानस्थलसम्म पु–याइन्छ । हामीलाई पनि उनीहरुले यसरी नै उद्धार गर्छन् भन्ने आशा छ ।’जर्मनी दूतावासमा ३५ जना नेपाली कार्यरत रहेको उनले बताएका छन । जर्मनीले यसअघि नै आफ्ना नागरिकलाई घर फर्कन निर्देशन दिइसकेको छ ।