विचार नमिल्ने दलहरू बीचको गठबन्धन हिलोको किलो झैं हल्लिरहन्छ :बाबुराम भट्टराई

पूर्व प्रधानमन्त्री एवम् जनता समाजवादी पार्टी, नेपालका संघीय परिषद् अध्यक्ष डा बाबुराम भट्टराईले दिगो लोकतान्त्रिक स्थिरता, सुशासन र समृद्धिका निम्ति गम्भीर भएर विकल्प सोच्न अपिल गरेका छन् ।

बिहीवार राति सामाजिक सञ्जाल ट्वीटरमा एक ट्वीट गर्दै डा.भट्टराईले यस्तो आह्वान गरेका हुन् ।

उनले विपरित वैचारिक तथा राजनीतिक धरातलमा उभिएका दलहरूबीच केवल गणितीय आधारमा बन्ने गठबन्धन सधैं हिलोको किलो झैं हल्लने र केही महत्वाकांक्षी व्यक्तिको मोलतोलको साधन मात्र हुने उल्लेख गरेका छन् ।

उनले भनेका छन्,विपरित वैचारिक राजनीतिक धरातलमा उभिएका दलहरूबीच भगत गणितीय आधारमा बन्ने गठबन्धन सधैं हिलोको किलो झैं हल्लने र केही महत्वाकांक्षी व्यक्तिको मोलतोलको साधन मात्र हुन्छ । त्यसले दीर्घकालमा देश र जनताको हित गर्दैन । दिगो लोकतान्त्रिक स्थिरता,सुशासन,समृद्धिका निम्ति गम्भीर ढंगले विकल्प सोचौं ।

त्यस्तै जनता समाजवादी पार्टी जसपा का अध्यक्ष उपेन्द्र यादवले नेपाली कांग्रेस र नेकपा माओवादी केन्द्रले नेकपा एकीकृत समाजवादी र आफ्नो पार्टीलाई पन्छाएर गठबन्धन गरेको खुलासा गरेका छन् ।

प्राइम टाइम्स टेलिभिजनको ‘जनता जान्न चाहन्छन्’ कार्यक्रमका लागि पत्रकार ऋषि धमलासँग हिजो राति कुरा गर्दै जसपा अध्यक्ष यादवले भने, “हामी अहिले पनि ५ दलीय गठबन्धनमै छौं । गठबन्धनभित्र महानगर र उपमहानगरमा हामीबीच समझदारी भएको थियो । नेपाली कांग्रेस त्यो समझदारी अनुसार कतिपय ठाउँमा अगाडि बढेन । गठबन्धनभित्र पनि अर्को गठबन्धन भएछ । माओवादी र कांग्रेस मिलेर एकीकृत समाजवादी र जसपालाई पछाडि धकेल्ने काम भएछ । त्यसमा हाम्रो असहमति छ, असन्तुष्टि छ ।

स्थानीय तहको निर्वाचनमा जसपालाई घाटा नभएको पनि उनले बताए । उनले भने, “स्थानीय तहमा हामीलाई घाटा भएको छैन । पहिले भन्दा चारपाँच गुना बढी मत पाएका छौं । वडाको संख्या बढेको छ । क्षेत्र विस्तार भएको छ । पहिले पनि चौथो थियो, अहिले पनि चौथै छ । केही साथीहरु लोसपा बनाएर छुट्टिनुभयो । उहाँहरुले पार्टी फुटाएर के पाउनुभो त ? हामी सैद्धान्तिक रुपमा फरक छौं तर मुद्दामा समानता छ । उहाँहरुले चाहनुभयो भने सहकार्य असम्भव छैन ।”