एमालेमा ६नेताले पाए महत्वपुर्ण जिम्मेवारी, भिम रावल र लेखराज भट्टले गरे अंकमाल

प्रमुख प्रतिपक्षी दल नेकपा एमालेले देशभरका कार्यकर्तालाई एकताको सन्देश दिँदै एकतावद्ध एमालेको निर्माणको दिशामा अघि बढेको छ ।

एमाले विभाजनका लागी भन्दै यस अघिका वरिष्ठ नेता माधव कुमार नेपालले आफुलाई साथ दिएका सांसद तथा केन्द्रीय सदस्यलाइ चन्द्रागिरी रिसोर्ट पुर्र्याएका बेला यता एमालेले एक ढिक्का भएको सन्देश दिएको छ ।

आज तुलसीलाल स्मृती प्रतिष्ठान च्यासलमा भएको एमाले स्थायी कमिटी बैठकले विभिन्न महत्वपूर्ण निर्णयहरु गर्दै एमाले एक एकताको सन्देश दिएको छ । महत्वपुर्ण जिम्मेवारी सहित ६ जना नेताहरुको छुट्टै कार्यदल पनि आजको बैठकले बनाएको छ ।

नेकपा एमालेले १० बुँदे सहमति कार्यान्वयन क्रममा उत्पन्न हुने समस्या समाधान गर्न कार्यदल गठन गरेको छ । स्थायी कमिटीको मंगलबार बसेको बैठकले १० प्रतिशत केन्द्रीय सदस्य मनोनयन सिफारिससमेत गर्न सो कार्यदल बनाएको हो ।

कार्यदलमा महासचिव ईश्वर पोखरेलसहित उपाध्यक्ष भीम रावल, उपमहासचिव विष्णु पौडेल, घनश्याम भुसाल र स्थायी कमिटी सदस्य सुरेन्द्र पाण्डे तथाा लेखराज भट्ट रहेको बैठकपछि प्रवक्ता प्रदीप ज्ञवालीले जानकारी दिए ।

बैठकले केन्द्रीय कमिटी, केन्द्रीय निकाय, प्रदेश, जिल्लालगायत सबै तहका कमिटी र जनसंगठनहरुलाई २०७५ जेठ २ गते पूर्वको जिम्मेवारीमा क्रियाशील हुन निर्देशन दिएको ज्ञवालीले बताए ।

माधव नेपालको पार्टीमा गएकाहरुको हकमा कार्यदलले टुंगो लगाउने भएको छ । त्यस्तै केन्द्रीय निकाय र विभागहरुलाई पूर्णता दिने पनि यही कार्यदललाई जिम्मा छ ।

सदस्यता नवीकरणलाई पनि २०७५ जेठ २ गतेको सदस्यतालाई आधार बनाउने र एकीकरणमा आवद्ध भएका र २०७५ जेठ ३ पछि सदस्यता प्रदान गरिएका पार्टी सदस्यहरुको सदस्यता समेत सम्बन्धित जिल्ला कमिटीले नवीकरण गर्ने बैठकले निर्णय गरेको छ ।