आजै राजिनामा मागेर उफ्रनेहरु मूख्यमन्त्री आचार्यको जवाफ सुनेर हिस्स

नेकपा एमाले विभाजन गरेर नेकपा एकिकृत समाजवादी बनेका केही प्रदेश सांसदहरुले एमाले परित्याग गरि नेकपा एसका पक्षमा सनाखत गर्दा भर्खरै मात्रै प्रदेश नम्बर १को मुख्यमन्त्री बनेका भिम आचार्य अल्पमतमा परेका छन् तर पनि उनले हिम्मत हारेको छैनन् ।

नेकपा एसका पक्षमा सनाखत गरे पछि प्रदेश सांसद राजेन्द्र राई लगायतले मुख्यमन्त्री भिम आचार्य सँग राजिनामा मागेका थिए । राजिनामा माग्नेहरुलाई मुख्यमन्त्री आचार्यले मुखभरिको जवाफ फर्काएका छन् । संसद फेस गर्न तयार रहको चुनौती पनि उनले दिएका छन् ।

प्रदेश १ का मुख्यमन्त्री भीमप्रसाद आचार्यले अल्पमतमा परेपनि उनले ठूलो आँट गरेका छन् । प्रदेशसभाबाट विश्वासको मत लिने बताएका हुन् । स्रोतका अनुसार उनको आँटको नेकपा एमाले अध्यक्ष केपी शर्मा ओलीले समेत प्रशंसा गरेका छन् ।

प्रदेशसभामा प्रतिनिधित्व गर्ने एमालेका १० सांसद नेकपा एकीकृत समाजवादीमा सामेल भएसँगै प्रदेश सरकार अल्पमतमा परेको सन्दर्भमा उनले तत्काल राजीनामा नदिने प्रस्ट पारे । मुख्यमन्त्री आचार्यले आफू अल्पमतमा परे पनि संवैधानिक प्रावधान अनुसार अघि बढ्ने बताए ।

कुरा गर्दै उनले भने, ‘संविधान अनुसार म मुख्यमन्त्री भएको हो, संविधानमा एक महिनाभित्र विश्वासको मत लिनुपर्ने प्रावधान छ । जसअनुसार म विश्वासको मत फेस गर्छु, राजीनामा दिन्नँ ।’

प्रदेश १ बाट एमाले छाडेर नेकपा एकीकृत समाजवादीमा सामेल भएका राजेन्द्र राई लगायतका सांसदले मुख्यमन्त्री अल्पमतमा परेको भन्दै राजीनामा माग गरिरहेको सन्दर्भमा मुख्यमन्त्री आचार्यले तत्काल राजीनामा नदिने प्रस्ट पारेका हुन् ।

मुख्यमन्त्री आचार्यले संसदमा आफूले विश्वासको मत प्राप्त गर्ने विश्वाससमेत व्यक्त गरे । उनले भने, ‘म काम गर्ने मान्छे हुँ, त्यसैले काम चाहने साथीहरूले मलाई भोट दिनुहुन्छ भन्ने विश्वास छ ।’ मुख्यमन्त्री आचार्य यसअघि एमालेमा माधवकुमार नेपालको पक्षमा उभिएका थिए ।

पार्टी विभाजन हुने अवस्थामा पुगेपछि भने उनी तेस्रो धारमा सामेल भए । एमाले अध्यक्ष केपी शर्मा ओलीसँग तेस्रो धारको सहमति भएसँगै एमालेमै रहेका आचार्य त्यसलगत्तै मुख्यमन्त्री बनेका हुन् ।

भदौ १० गते प्रदेश १ का तत्कालीन मुख्यमन्त्री शेरधन राईले राजीनामा दिएर आचार्यलाई मुख्यमन्त्री बाटो खोलिदिएका थिए । प्रदेशसभामा एमालेका कुल ५० सांसदमध्ये १० जना नेकपा एकीकृत समाजवादीमा आवद्ध भएपछि आचार्य नेतृत्वको सरकार अल्पमतमा परेको छ ।

प्रदेशसभामा विश्वासको मत प्राप्त गर्न कम्तीमा ४७ सांसदको समर्थन आवश्यक पर्दछ । एमालेका ५१ सांसदमध्ये १० नेकपा एकीकृत समाजवादीमा प्रवेश गरेसँगै मुख्यमन्त्री आचार्यले विश्वासको मत हासिल गर्ने सम्भावना भने खुम्चिएको छ ।

प्रदेशसभामा अहिले नेपाली काँग्रेसका २१, नेकपा माओवादी केन्द्रका १५, नेकपा एकीकृत समाजवादीका १०, जनता समाजवादी पार्टीका ३, संघीय लोकतान्त्रिक राष्ट्रिय मञ्चका १ र राप्रपाका १ सांसद छन् । राप्रपाकी इन्दिरा राईबाहेक सबै विपक्षी गठबन्धनमा आबद्ध रहेकाले सो गठबन्धनको पक्षमा ५० सांसद पुग्ने देखिन्छ ।