खल्तीबाट बाहिर निस्कन नमानेको लामिछानेहरुको राजिनामा !

महिना अगाडीनै रास्वपाबाट युवा तथा खेलकुद मन्त्री बनेका विराजभक्त श्रेष्ठले आफुहरुले मन्त्रीको राजिनामा खल्तीमा बोकेर हिँडिरहेको बताएका थिए ।

राजिनामा मात्रै होइन रास्वपाले सरकारलाई दिएको समर्थनको बारेमा पनि सोच्नु बेला भएको उनले भनेका थिए । गठबन्धन धुमधामले चलिरेहेका बेला मन्त्री श्रेष्ठको उक्त अभिव्यक्तिले ठुलै हल्लाखल्ला मच्चाएको थियो ।

अहिले १८० डिग्रिमा राजनितीले कोल्टे फेरिसक्दा पनि गोजिमा भएको रास्वपाका मन्त्रीहरुको राजिनामा फुत्त बाहिर निस्किएको छैन ।

राजनितीमा रास्वपाले कति सम्म आलोकाँचोपन देखाएको छ भने राजिनामा दिन भनेर बालुवाटार पुगेका मन्त्रीहरु प्रचण्डको दुई शब्द गुलिया कुरा सुनेर राजिनामा नदिइ मुख मिठ्याएर झण्डा हल्लाउँदै फर्किएका थिए ।

निर्णय क्षमतामा रास्वपा कति सम्म अल्लारे र अपरिपक्क छ भन्ने यो घटनाले देखाएको छ । राजिनामा बोकेर बिहानै बालुवाटारको दैलो पुगेका रवि लामिछानेहरुको कानमा प्रचण्डले के मन्त्रोचारण गरेर घण्टी बजाइदिएर उनीहरु खल्तीको राजिनामा खल्तीमै थन्काएर फर्किए भन्ने कुरा चाखलाग्दो देखिएको छ ।

कुनै बेला पुष्पकमल दहाल प्रचण्ड विरुद्धनै हाँक दिएर राष्ट्रिय राजनितीमा उदाएका रवि लामिछाने अहिले प्रचण्डकै छत्रछायाँमा लटपुटिने एक निरिह पात्रमा परिणत हुँदै गएका छन् ।

बताइए अनुसार प्रचण्डले लामिछानेलाई सुटुक्क अर्को कोठामा लगेर अहिलेनै हतारिएर राजिनामा नदिन भनेका थिए । विश्वासको मत दिने बेला सम्म राजनितीको सिन चेन्ज गर्न सकिने कन्फीडेन्ट दिँदै प्रचण्डले गृहमन्त्रीको झण्डा फेर्नु नपर्ने आश्वासन दिए पछि लामिछाने सोमप्रसादको सपना देखेर बालुवाटारबाट सिंहदरबारतिर हुँइकिएको खबर छ ।

भनिन्छ नी जब मानिस कमजोर र निरिह हुन्छ तब उसले जादु र चमत्कारको कुरा गर्न थाल्छ । प्रचण्डले त मुखै खोलेर आफुलाई जादुगर भनिसकेका छन् भने रवि लामिछाने पनि २८ गते सम्म प्रचण्डले कुनै चमत्कार गरिदिए गृहमन्त्रीको झण्डा हल्लाएरै कुदिरहन पाउने परिकल्पनामा हराएर आशाको खेती गर्न थालेका छन् ।

पदलोलुपताको आकांक्षाले ग्रसित भए पछि कस्तो सम्म हुँदो रहेछ भन्ने दृश्य अहिले संसदमा गजबले देखिएको छ । माओवादी केन्द्र र रास्वपाका सांसदहरुको एउटै लोलि, एउटै बोलि सुनिन्छ । ओलीबा र देउबाले अंगालो मारे पछि नानीका बाको चमत्कारको आशामा बसेका लामिछानेहरुलाई आफ्नै खल्तीमा भएको राजिनामाले भने प्रत्येक क्षण गिज्जाइरहेको होला ।

कुनै नाटकिय परिवर्तन नभए असार २८ गते प्रधानमन्त्री पुष्कमल दहाल प्रचण्डको लज्जास्पद बहिर्गमन निश्चित छ । माधव नेपालको एकिकृत समाजवादी बाहेक प्रचण्डको अन्तिम सारथी रवि लामिछानेनै हुनेछन् । प्रचण्ड विरुद्ध धावा बोलेर राष्ट्रिय राजनितीमा उदाएका रविको यो दहको प्रचण्डभक्ती र समपर्णको जवाफ उनले पाइला पाइला दिनु पर्ने छ । उनका समर्थकहरुका यहि प्रश्नको घण्टीले उनको कानमा चिमोटिरहने छ ।