पूर्वाञ्चल मेडिकल कलेज सञ्चालनमा

वर्षौँदेखि केवल कागजी प्रक्रियामै अड्किएको पूर्वाञ्चल विश्वविद्यालयको मेडिकल कलेज अब अन्ततः सञ्चालनमा आएको छ। यो उपलब्धि मोरङ क्षेत्र नं. ३ र सम्पूर्ण कोशी प्रदेशको इतिहासमा एक गौरवपूर्ण कोशेढुङ्गा हो । आज, मोरङका जनतासँग गरेको मेरो एक ठोस प्रतिबद्धता पनि पूरा भएको छ, त्यस्तो प्रतिबद्धता, जसले आमनागरिकलाई स्वास्थ्य, शिक्षा र रोजगारीको क्षेत्रमा सहजता, पहुँचता र दिगोपन अभिवृद्धि गर्नेछ।

यसलाई सञ्चालनमा ल्याउने यात्रा सहज थिएन। २०६१/२०६२ सालतिर यसको तयारी लगभग सम्पन्न भए पनि जनआन्दोलनका कारण कार्यान्वयन रोकियो । त्यसपछि धेरै सरकार बने, विभिन्न दलका जनप्रतिनिधिहरू निर्वाचित हुनुभयो, तर मेडिकल कलेज सञ्चालनमा आउन सकेन। यसबीच मलाई समेत यसको ढिलाइको दोषारोपण गरियो। तर आज, यो सफलता केवल मेरो व्यक्तिगत गौरव होइन, यो सम्पूर्ण नेपाली जनताको साझा विजय हो ।

यस ऐतिहासिक क्षणलाई सम्भव बनाउन भूमिका खेल्नु हुने सम्माननीय प्रधानमन्त्री केपी शर्मा ओली, पूर्वप्रधानमन्त्री तथा नेपाली कांग्रेसका सभापति शेरबहादुर देउवा, आदरणीय डा. शेखर कोइराला, ने. क. पा. माओवादीका नेता तथा राष्ट्रियसभा सदस्य गोपी आछामी, पुर्ब राष्ट्रियसभा सदस्य तथा ने.का नेता रमेश जंग रायमाझी, माननीय मानबहादुर लिम्बू गठबन्धन सरकारका नेतागण, चिकित्सा शिक्षा आयोगका उपाध्यक्ष तथा पदाधिकारीहरु, पूर्वाञ्चल विश्वविद्यालयका कुलपति, डिन, मोरङका नेतागण, विभिन्न संघ संस्था, बुद्धिजीवी, स्थानीय नागरिक र शुभेच्छुकहरू सबैप्रति म हार्दिक आभार व्यक्त गर्दछु ।

यो केवल एउटा मेडिकल कलेजको सञ्चालन मात्र होइन, यो हाम्रो सामूहिक सपना, अटूट दृढता र एकताको प्रतिफल हो। अब कोशी प्रदेसमा शिक्षा तथा अनुसन्धानको नयाँ युगको सुरुवात हुनेछ, प्रदेशका लाखौँ नागरिकले आफ्नै घरआँगनमै सुलभ र गुणस्तरीय स्वास्थ्य सेवा प्राप्त गर्नेछन्, र हजारौँ युवाले रोजगारी पाउनेछन् । यो ऐतिहासिक उपलब्धि हाम्रो पुस्ताले भविष्यलाई दिएको एक अमूल्य उपहार हो