कस्ले निभायो सर्बाेच्चको आगो ? तीन जनाको तीनथरि कुरा

जेन–जी आन्दोलनका क्रममा भदौ २४ गते देशभरका तमाम भौतिक संरचनामा आगजनी गरियो। राजधानीमा राज्यका प्रमुख तीन अंग कार्यपालिका, न्यायपालिका र व्यवस्थापिकाका कार्यालय जलाइए। अर्थात् प्रधानमन्त्रीको कार्यालय सिंहदरबार, सर्वोच्च अदालत र संघीय संसद् भवनमा आगजनी भयो। अहिले न्यायपालिका अर्थात सर्बाेचच अदालतमा लागेको आगो कसले निभायो भन्ने बहस सुरु भएको छ ।

सर्वोच्च अदालतमा भएको आगलागीबारे देशका तीन प्रमुख निकायका फरक–फरक बयानले अहिले सार्वजनिक रूपमा नयाँ प्रश्न उठाएका छन् । सर्वोच्च अदालत, काठमाडौं महानगर र नेपाली सेनाले आगलागी कहिले निभाइयो भन्ने विषयमा फरक तथ्य प्रस्तुत गरेपछि घटनाको वास्तविकता र समन्वयको कमजोरीबारे चर्चा फेरि चर्किएको छ ।

१. प्रधानन्यायाधीशको भनाइ : “तीन दिनसम्म आगो बलिरहेको थियो”

प्रधानन्यायाधीश प्रकाशमान सिंह राउतले असोज ३ गते पत्रकार टिकाराम यात्रीसँगको अन्तर्वार्तामा भनेका थिए—

“सर्वोच्च अदालतमा तीन दिनसम्म आगो बलिरहेको थियो । तेस्रो दिन अर्थात २६ गते ललितपुर महानगरका मेयर चिरिबाबु महर्जनलाई अनुरोध गरेर दमकल मगाएर २६ र २७ गते लगाएर आगो निभाइयो ।”

उनको यो भनाइ अनुसार आगलागी भदौ २४ गते सुरु भई २७ गतेमात्र पूर्ण नियन्त्रणमा आएको बुझिन्छ ।

२. मेयर बालेन शाहको दाबी : “२५ गतेदेखि २७ गतेसम्म निरन्तर दमकल परिचालन”

काठमाडौं महानगरका मेयर बालेन शाहले असोज २१ गते फेसबुकमार्फत र महानगरको दमकल परिचालन टाइमसिट सार्वजनिक गर्दै भनेका थिए—

“सर्वोच्च अदालतमा लगाइएको आगो निभाउन काठमाडौं महानगरको दमकल असोज २५ गते बिहान ९:३० बजेदेखि दिउँसो २:३० बजेसम्म, असोज २६ गते बिहान ७:३० बजेदेखि साँझ ६ बजेसम्म, र असोज २७ गते बिहान ८:०० बजेदेखि साँझ ६ बजेसम्म निरन्तर खटिएको थियो ।”

यस अनुसार, महानगरले तीन दिन लगातार दमकल परिचालन गरेको देखिन्छ । र, आगो नियन्त्रणमा लिन लामो समय लागेको संकेत मिल्छ ।

३. नेपाली सेनाको प्रतिक्रिया : “आगो भोलिपल्टै निभेको हो”

नेपाली सेनाले असोज ३१ गते आयोजना गरेको प्रेस मिटमा भने फरक मत राख्दै भन्यो—

“सर्वोच्च अदालतको आगो भोलिपल्टै अर्थात भदौ २५ गते निभिसकेको थियो । यस विषयमा मिडियामा आएको अन्य कुरा (अर्थात प्रधानन्यायाधीशले भनेका कुरा) गलत हुन् ।”

सेनाको भनाइ अनुसार आगलागी नियन्त्रणमा आउन २४ घण्टा पनि लागेको थिएन, जुन अदालत र महानगरका विवरणसँग पूर्ण रूपमा विपरीत छ ।