इन्चार्ज तँ की मँ भन्दै भिम रावल र लेखराज भट्टको सार्वजनिक ठाउँमै चल्यो जुहारी

नेकपा एमालेको सुदूरपश्चिम प्रदेशको इन्चार्ज को हो भन्ने विवाद फेरी पेचिलो बन्दै गएको छ ।

एमाले उपाध्यक्ष भिम रावल की नेता लेखराज भट्ट को हो इन्चार्ज भनेर अहिले दुइ नेताको हानाथाप नै भएको छ । दुवै नेताले आफु नै इन्जार्ज भएको दावी गरेका छन् ।

आज एकै दिन भिम रावल र लेखराज भट्ट दुवैले आफुनै इन्चार्ज भएको दावी सार्वजनिक रुपमै गरेका छन् । दुवै नेता अहिले काठमाडौँ छोडेर सुदुरपश्चिम पुगेका छन् । दुवैले आफ्नो प्रतिष्ठाको विषय बनाए पछि यो विषय झनै पेचिलो बनेको छ ।

नेकपा एमालेका उपाध्यक्ष भीम रावलले एमाले सुदूरपश्चिम संयोजकबाट आफूलाई हटाएको कुरामा सत्यता नभएको दाबी गरेका छन्।

धनगढीमा आयोजित कार्यकर्ता भेलालाई सम्बोधन गर्दै रावलले भने, ‘मलाई इन्चार्जबाट हटाएको कुरामा सत्यता छैन। म एमाले उपाध्यक्ष र सुदूरपश्चिम संयोजक हुँ।’

उनले आफू पार्टीको हितको लागि पद छाड्नसमेत नडराउने मान्छे भएको उनले बताए। अध्यक्ष केपी शर्मा ओलीलाई संकेत गर्दै उनले उपलब्धि नहुने गरि कसैले कसैलाई दिएको जिम्मा अर्थ नभएको दाबी गरे।

१० बुँदे कार्यान्वयनको जिम्मेवारीबाट कसैले पनि पन्छिन नहुने बताउदै उपाध्यक्ष रावलले भने, ‘१० बुँदे कार्यान्वयन गर्नु सबै नेता–कार्यकर्ताको कर्तव्य हो। १० बुँदे कार्यान्वयनको अर्थ एमाले २०७५ जेठ २ को अवस्थामा जानु हो।’

१० बुँदे सहमति अक्षरशः कार्यान्वयन गर्ने सम्पूर्ण नेता(कार्यकर्ताको कर्तव्य रहेको उनको भनाइ छ। एमाले सुदूरपश्चिम इन्चार्जको विषयमा उपाध्यक्ष रावल र नेता लेखराज भट्टबीच विवाद चलिरहेको छ। एमाले अध्यक्ष ओलीले सुदूरपश्चिमको इन्चार्ज लेखराज भट्ट नै भएको बताएपछि रावल असन्तुष्ट बनेका छन्।

आजनै नेकपा एमालेका नेता लेखराज भट्टले आफू नै पार्टीको सुदूरपश्चिम प्रदेश इन्चार्ज भएको बताएका छन् । मंगलबार प्रेस चौतारी कञ्चनपुरले पार्टी कार्यालय महेन्द्रनगरमा आयोजना गरेको पत्रकार सम्मेलनमा नेता भट्टले आफू नै सुदूरपश्चिम प्रदेश पार्टीको इन्चार्ज भएको बताएका हुन्।

‘मलाई अध्यक्षज्यूले तपाईं नै प्रदेशको इन्चार्ज भनेको हो,’ उनले भने, ‘भीम रावललाई संयोजन गर्ने जिम्मेवारी हो, मेरो भीम रावलसँग कुनै मतभेद छैन।’ उनले आफूलाई पार्टीले प्रदेश इन्चार्जको जिम्मेवारी दिएकाले भ्रममा नपर्न आग्रह गरे। एमाले विभाजनपूर्व भीम रावल माधव नेपाल समूहमा रहेका थिए। विभाजनमा नेपाललाई साथ नदिएका रावल भट्टलाई प्रदेश इन्चार्ज बनाउँदा असन्तुष्ट छन्।