आजै राती सम्ममा संसदमाथी अर्को घात गर्ने तयारीमा देउवा सरकार

तत्कालिन प्रधानमन्त्री केपी ओलीले विघठन गरेको संसद सर्वोच्च अदालतले दुई पटक पुनस्थापना गर्यो तर संसदले राम्रो सँग काम गर्न सकेको छैन ।

सर्वोच्चको परामादेश बाट प्रधानमन्त्री बनेका शेरबहादुर देउवा र संसदको पुरा कार्यकालकै लागी भनेर ज्यान दिएर लडेका सत्ता गठबन्धनका दलले सदनलाई निकम्मा बनाइरहेका छन् । फेरी पनि संसद माथी अर्को घात आजै राती सम्ममा गर्ने तयारीमा देउवा सरकार रहेको छ ।

मन्त्रीपरिषदनै विस्तार गर्न नसकेर लाचार भएको गठबन्धनले आजै राती सम्ममा संसदको चालु अधिवेशन अन्त्य गरेर मन्त्रीपरिषद विस्तार गर्ने तयारी गरेको छ । संसद अधिवेशन अन्त्य गर्ने र सरकारले ल्याएको दल विभाजन सम्बन्धी अध्यादेश फिर्ता लिने तयारी सरकारले गरेको छ ।

सत्तारुढ गठबन्धन दलहरुबीच विपक्षी दल विभाजन गर्न ल्याइएको अध्यादेशले गठबन्धनभित्रकै दल विभाजित हुने निश्चितजस्तै भएपछि अध्यादेश खारेज गरेर मात्र मन्त्रिपरिषद् विस्तार गर्ने सहमति भएको छ ।

अध्यादेश फिर्ता नलिँदा जनता समाजवादी पार्टी फेरि विभाजित हुने खतरा देखिएपछि अध्यादेश फिर्ता लिने सहमति बनेको हो ।त्यसका लागि संसद्को चालु अधिवेशन अन्त्य गर्नुपर्ने भएकाले आज (सोमबार) रातिसम्ममा अधिवेशन अन्त्य गर्ने सम्भावना पनि बढेको छ ।

प्रतिनिधिसभा र राष्ट्रिय सभाका आज बस्ने बैठकबाट बजेट सम्बन्धी विधेयकहरु सबै पारित गर्ने र अधिवेशन अन्त्य गर्ने सहमति भएको बुझिएको छ ।सत्ता गठबन्धनको हिजो (आइतबार) बसेको बैठकले सरकारलाई पूर्णता दिने जिम्मा शीर्ष नेताहरुलाई दिएको थियो ।

गठबन्धन दलहरुबीच कुरा नमिल्दा शेरबहादुर देउवा प्रधानमन्त्री बनेको साढे दुई महिना बितिसक्दा पनि मन्त्रिपरिषद्ले पूर्णता पाउन सकेको छैन ।