आज बिहानै देखी देउवाको मन खिन्न

लामो समय देखी संसदमा रहेको गतिरोध अन्त्यका लागी प्रधानमन्त्री शेरबहादुर देउवाले बोलाएको सर्वदलीय बैठक प्रमुख प्रतिपक्षीदल नेकपा एमालेले बहिस्कार गरेको छ ।

प्रधानमन्त्री देउवाले बोलाएको बैठक भर्खरै बालुवाटारमा सुरु भएको छ तर प्रमुख प्रतिपक्षी दल नेकपा एमालेनै बैठकमा सहभागी भएको छैन । जसको लागी बोलाएको हो उनै बैठकमा सहभागी नभए पछि प्रधानमन्त्री देउवा खिन्न भएका छन् ।

संसदमा प्रतिनिधित्व गर्ने दलहरूलाई निमन्त्रणा गरिए पनि प्रमुख प्रतिपक्ष दल नेकपा एमालेले बैठक बहिष्कार गरेको छ । बैठकस्थलमा एमाले प्रतिनिधिका लागि छुट्याइएको कुर्सी खाली छन् ।

देउवा नेतृत्वको सरकारले अध्यादेश ल्याएर आफ्नो दल फुटाएको साथै सभामुख अग्नि सापकोटा त्यसमा सहयोगी बनेको भन्दै एमालेले सडक र सदनमा निरन्तर विरोध गर्दै आएको छ ।

गैरसंवैधानिक अध्यादेश ल्याएर गर्नुपर्ने जति सबै काम गरेपछि बोलाइएको सर्वदलीय बैठकको कुनै अर्थ नहुने भन्दै प्रमुख सचेतक विशाल भट्टराईले अध्यक्ष केपी ओली र एमालेका कुनै प्रतिनिधि सहभागी नहुने बताए यसअघि सभामुख सापकोटाले बोलाएको सर्वदलीय बैठक पनि एमालेले बहिष्कार गरेको थियो।

आफूहरूले कारवाही गरेका १४ सांसदको सभामुखले सूचना टाँस गर्नुपर्ने या मार्गप्रशस्त गर्नुपर्ने भन्दै त्यो बाहेकका एजेण्डामा कुनै छलफल नहुने एमालेको अडान छ । यही विषयमा एमालेले संसदमा अवरोध जारी राखेको छ । सभामुखले भने सदनका कारवाही निरन्तर अघि बढाइरहेका छन् ।

आफ्नो अडान भन्दा कुनै पनि कुरामा तल माथी नगरीकन एमाले बसेको छ । केहि दिन अघि मात्रै पनि एमाले अध्यक्ष ओलीले प्रधानमन्त्री देउवालाई चेतवानी युक्त सन्देश पठाएका थिए ।

प्रमुख प्रतिपक्षीले हरेक बैठक बहिस्कार गर्दा सत्तापक्ष चेपुवामा पर्दै गएको छ । एमाले सहभागी नभएको बैठक सर्वदलीय नभएर सरकार दलीयमा परिर्णत भएको एमाले नेता सुमनराज प्याकुरेलले ओटीभी नेपाललाई बताए ।