न्यायलयमा भएको पछिल्लो विवादको महत्पवूर्ण कारण भनेको २८ असारको परमादेश: एमाले

नेकपा एमालेका नेता प्रदिप ज्ञवलीले न्यायलयमा भएको पछिल्लो विवादको महत्पवूर्ण कारण भनेको २८ असारको परमादेश प्रमुख कारण भएको बताएका छन्।

‘यसमा प्रधानन्यायाधीशसँग त्यस एजलासमा रहेको न्यायाधीशहरूको पनि उत्तिकै जवाफदेहिता रहन्छ । एउटालाई दोष दिएर उरु उम्किन मिल्ने हामी देख्दैनौँ’ उनले भने, ‘अहिले जुन ढंगले पूर्वप्रधानन्यायाधीशहरू तथा राजनीतिक दलसँग आबद्ध भएका मिडियाहरूले यस विषयमा जसरी चर्चा गरिरहेका छन्, यसले न्यायालयमा भएको विकृतिलाई हटाउने किसिमको देखिँदैन ।’

यो बहस विशेष रूपमा एउटालाई हटाउने र अर्कोलाई ल्याउने स्वार्थबाट प्रेरित भएको उनले बताए । यो समीक्षा समस्या समाधानको नभएको कारण यो विषयमा एमालेको रुचि नभएको उनले बताए ।

‘जुन ढंगले राजनीतिक विषयमा अदालत प्रवेश गर्यो र निश्चित राजनीतिक दलका स्वार्थका लागि अदालतको जुन ढंगले दुरुपयोग भयो अहिलेका समस्याको परिणाम पनि त्यही नै हो भन्ने हामी ठान्छौँ ।’ उनले भने ।

एमाले न्यायालयको समग्रको सुधारको पक्षमा रहेको उनले बताए । उनले पाँचदलीय गठबन्धनको स्वार्थका लागि न्यायालयको जसरी प्रयोग गरियो, यसैको परिणाम भएको बताए ।

निश्चित राजनीतिक स्वार्थ समूह अथवा अरु स्वार्थ समूहको हितमा न्यायालयलाई प्रयोग गरिएको कारण त्यसमा एमालेको रुचि नभएको र त्यो कुनै समाधान पनि नभएको उनले बताए ।

‘न्यायाधीशको विरुद्ध कुनै महाअभियोग लगाउनुले समस्या समाधान हुन्छ भन्ने हामीलाई लाग्दैन’ उनले भने, ‘यो चाहिँ एक खालको दबाब हो ।’ केही स्वार्थ समूहले निश्चित न्यायाधीशलाई थर्काएर आफ्नो अनुकूल मुद्दा फैसला गराउनका निम्ति गरेको दबाबको रणनीति भएको उनले बताए ।