कांग्रेस नेता प्रकाशमान सिंह नेपालगन्जबाट सुटुक्क भारत जानुको कारण यस्तो !

पार्टीको सभापति पदमा उम्मेदवारी दिएका नेपाली कांग्रेसका नेता प्रकाशमान सिंह बिहीबार नेपालगन्ज हुँदै नयाँ दिल्ली पुगेका छन् ।

नेता सिंह भारतीय जनता पार्टीका अध्यक्ष जगतप्रकाश नाड्डा भेट्न भारत गएको स्रोतको दाबी छ।

उनी बर्दियामा बुधबार आयोजित एक कार्यक्रम सकेर ‘अचानक’ उतैबाट भारत पुगेका हुन्।

प्रधानमन्त्रीसमेत रहेका वर्तमान सभापति शेरबहादुर देउवासँग आसन्न महाधिवेशनमा प्रतिस्पर्धा गर्न संस्थापनइतर समूहबाट नेता सिंहसहित वरिष्ठ नेता रामचन्द्र पौडेल, महामन्त्री शशांक कोइराला र नेता शेखर कोइरालाले सभापति पदका लागि उम्मेदवारी घोषणा गरेका छन्। तर संस्थापनइतर समूहबाट साझा एउटा मात्र उम्मेदवार बन्नुपर्नेमा छलफल जारी छ। यहीबीच एक जना उम्मेदवार सिंह भारत जानुलाई कांग्रेस वृत्तमा अर्थपूर्ण रूपमा हेरिएको छ।

महाधिवेशन निजकिँदै गर्दा कांग्रेस नेताहरूको भारत दौडधुप बढेको छ। केही दिनअघि मात्र कांग्रेसका महामन्त्री शशांक कोइराला भारत भ्रमणबाट फर्किएका थिए। भारतमा उपचार गराइरहेका नेताहरू प्रदीप गिरी र कर्मा घले भेट्न भनेर गएका उनले भारतीय जनता पार्टीका विदेश विभाग प्रमुख विजय चौथाइवालेसँग पनि भेटवार्ता गरेका थिए।

शशांक कोइरालाअघि प्रधानमन्त्री एवं कांग्रेसका सभापति शेरबहादुर देउवाको दूतका रूपमा कांग्रेसका सहमहामन्त्री डा। प्रकाशरण महत टोलीसहित भारत गएका थिए। त्यहाँ उनले भाजपा अध्यक्षलगायत नेतासँग भेटवार्ता गरेका थिए। केही समयअघि नेपाल भ्रमणमा आएका भाजपाका वैदेशिक मामिला विभागका प्रमुख विजय चौथाइवालेको निमन्त्रणामा सहमहामन्त्री डा। महतको नेतृत्वमा नेताहरू उदयशमशेर राणा र अजय चौरसिया भारत भ्रमणमा गएका थिए।

त्यसलगत्तै कांग्रेसका महामन्त्री शशांक कोइराला भारत गएका थिए भने अहिले कांग्रेसका पूर्वमहामन्त्री सिंह भारत पुगेका हुन्।