मध्यरातमा चितवनबाट आएको खबरले देशभरका एमालेमा खुशियाली

चितवनमा चलिरहेको प्रमुख प्रतिपक्षी दल नेकपा एमालेको दशौँ राष्ट्रिय महाधिवेशनमा मध्यरातमा देशभरका कार्यकर्तामा खुशियाली छाउँने खबर आएको छ ।

दिउँसो नारायणी किनारमा लाखौँ जनता उतारेर शक्ति प्रदर्शन सहित उद्घाटन सत्र भव्यताका साथ सम्पन्न गरेको एमालेले त्यस लगत्तै सौराहमा बसेको केन्द्रिय कमिटी बैठकले महत्वपुर्ण निर्णय लिएको छ जसले देशभरका एमालेजनमा आशाको संचार गराएको छ ।

नेतृत्व चयनका लागी भइरहेको महाधिवेशनमा सर्वसम्मत नेतृत्व चयन होस भन्ने सबै प्रतिनिधीहरुको एक मत देखिएको अवस्थामा सर्वसम्मत नेतृत्व चयन गर्ने दिशामा एमाले अघि बढेको छ । नेताहरुको व्यवस्थापनको सकसले सर्वसम्मत नहुने अवस्था बढ्दै गएको अवस्थामा एमालले सुझवुझपूर्ण निर्णय लिएको छ ।

नेकपा एमालेले केन्द्रिय कमिटीको आकार बढाएर ३०१ सदस्यीय बनाउने भएको छ । सौराहामा आयोजित पार्टीको अन्तिम केन्द्रिय कमिटी वैठकले सो निर्णय गरेको हो ।

एमालेले ९९ सदस्यीय पोलिटब्यूरो गठन गर्ने निर्णयसमेत गरेको छ । ४५ सदस्यीय स्थायी समिति यथावत रहने भएको छ । एमालेका आयोग २५ सदस्यीय हुने भएका छन् ।

अध्यक्ष केपी शर्मा ओलीको प्रस्तावअनुसार पदाधिकारी संख्यासमेत थप गरिएको छ । जसअनुसार उपाध्यक्ष ६ जना र उपमहासचिव तीन जना रहनेछन् । कुल पदाधिकारी संख्या १९ पुगेको छ । यस्तै सचिवालय १९ सदस्यीय हुने भएको छ । हाल पदाधिकारीमध्यबाट ५ जनाको सचिवालय बनाउने व्यवस्था रहेको थियो ।

अध्यक्ष केपी शर्मा ओलीले पार्टी एकताका लागि भन्दै राखेको प्रस्तावलाई केन्द्रिय समिति वैठकले सर्वसम्मतिले पारित गरेको हो । केन्द्रिय समितिले गरेको निर्णयअनुसार भोलीको बन्द सत्रमा विधान संसोधन प्रस्ताव पेश गरिने पार्टीका सचिव योगेश भट्टराईले जानकारी दिए ।

मध्यरातमा नेकपा एमालेको नर्वाैँ राष्ट्रिय महाधिवेशन बाट निर्वाचित केन्द्रिय कमिटीको अन्तिम बैठकले गरेका निर्णयहरु प्रस्तावको रुपमा बन्दसत्रमा प्रस्तुत गरिने छ । महाधिवेशन प्रतिनिधीहरुले पारित गरे पछि सोही संरचना एमालेमा क्रियाशिल हुने छ । हिजाको निर्णय पछि एमालेले सर्वसम्मत नेतृत्व चयनको बाटो तय गरेको नेताहरुले दावी गरेका छन्।