सलामी प्रकरणमा चर्को आलोचनापछि मन्त्री झाँक्रील बल्ल खोलिन मुख

संचार माध्यम र सामाजिक संजालमा सहरी विकासमन्त्री रामकुमारी झाँक्रीको ‘पिर्के सलामी’ को तस्बिर भाइरल भएसँगै मन्त्री झाँक्रीले चर्को आलोचना खेप्नु परेको छ ।

कुनै समयमा राष्ट्रपति विद्यादेवि भण्डारीदेखि अरु सांसद एवम् नेताहरुले त्यहि गर्दा चर्को आलोचना गर्ने मन्त्री झाँक्रीको त्यस्तै फोटो भाइरल भएसँगै उनको निक्कै आलोचना भइरहेको हो ।

मन्त्री झाँक्रीको ‘पिर्के सलामी’ को तस्बिर आलोचनासहित भाइरल भएसँगै उनको सचिवालयले यसबारे स्पष्टीकरण दिएको छ । सचिवालयको विज्ञप्तिमा भनिएको छ, ‘ हामी पाँच दिनदेखि गृह जिल्ला गुल्मीमा छौ । जिल्लाका विभिन्न पालिका तहमा पार्टीका कार्यक्रम,राजनीति दलका स्थानीय नेतृत्वसगँ अन्तरक्रियाको साथै जिल्लास्थित सरकारी कार्यालयहरुमा निरिक्षण,अनुगमन गर्ने काम भएको छ । यसै सिलसिलामा मदाने गाउँपालिका पुर्कोटदहमा रहेको ईलाका प्रहरी कार्यालय निरिक्षण गर्ने कार्यक्रम थियो । कार्यालय परिसरभित्र संघीय सरकारको मन्त्री हैसियतमा प्रवेश गर्दा संविधान,कानुन अनुसार सम्मान स्वरुप सलामी दिने प्रचलन रहेछ । आफ्नो परिसरभित्र प्रवेश गर्ने विशिष्ट व्यक्तिलाई सम्मान दिनु प्रहरीले आफ्नो कर्तव्य ठान्ने रहेछ ।’

आफूहरुसँग प्रहरी कार्यालयको निरिक्षण गर्ने कार्यक्रममा सहभागी हुने वा कार्यक्रम रद्द गर्ने भन्ने दुईवटा विकल्प रहेको भन्दै सचिवालयले अन्ततः पहिलो विकल्प रोजेर आफ्नै गाउँपालिकाभित्र रहेको संघीय सरकारको महत्त्वपूर्ण कार्यालयको निरिक्षण गरिएको जनाएको छ ।

विज्ञप्तिमा भनिएको छ, ‘यो प्रहरी कार्यालयसगँ मन्त्री ज्युको भावनात्मक सम्बन्ध पनि रहेको छ । द्वन्द्वको क्रममा खुम्चिएको प्रहरी कार्यालय पुनः स्थापना हुने क्रममा विभिन्न राजनीति कारणले अन्यत्र सारिएको थियो । वर्तमान शहरी विकास मन्त्री ज्युको पहलमा त्यो वेला पुर्कोटदहमै पुनःस्थापना गर्ने काम भएकोले पनि कार्यालय प्रमुख र स्थानीय समाजसेवीहरुले ईलाका प्रहरी कार्यालयको अनुगमन गराउन र सम्मान गर्न चाहानुहुन्थ्यो । त्यसकारण हामीले उहाहरुको आग्रहलाई स्वीकार गरेका हौँ ।’

आफूहरुलाई सामाजिक सन्जालमा आलोचना हुन्छ भन्ने पनि थाहा भएको तर यो कुनै आलोचना विषय भने नरहेको भन्दै सचिवालयले यो कानुनअनुसार राज्यको एउटा अगंले विशिष्ट व्यक्तिलाई आफ्नो कार्यालय परिसरभित्र दिने सम्मानको सामान्य प्रकृया मात्रै रहेको जनाएको छ ।

यस्तै मन्त्री झाँक्रीकी प्रेस सल्लाहकार क्रान्ति न्यौपानेले यो व्यक्तिलाई दिएको सलामी नभई मन्त्रीलाई दिएको सलामी भएकोले होहल्ला गरिरहनुपर्ने आवश्यक नरहेको प्रतिक्रिया दिएकी छिन् ।

जुनसुकै पार्टीको जो मन्त्री भएपनि सलामी पाउने प्रचलन रहेको र यसलाई पिर्के सलामी पनि नभनिने भन्दै उनले यो एउटा फौजीको नियम भएको उनको तर्क छ ।

सलामी ग्रहण गर्दा कुनै ड्यास बोर्डमा उभिनुपर्ने र त्यसको लागि केही अग्लो वस्तु राखिएको मात्रै रहेको भन्दै उनले यो आज मात्रै चलेको चलन नभएको बताएकी छिन् । उनले वर्षोदेखि चलेको चलन भएको र यी सबै विषयबारे सर्बसाधारणलाई जानकारी गराउनुपर्ने आवश्यकता नरहेको बताएकी छिन् ।

उनले कि कसैलाई पनि यस्तो सम्मान नगर्ने नियम बनाउन सक्नुपर्ने भन्दै नभए अनावश्यक हल्ला मच्चाउनुको कुनै तुक नरहेकोसमेत बताएकी छिन् ।