माओवादी केन्द्रको महासचिवमा नयाँ पात्रको इन्ट्री !

नेकपा माओवादीको केन्द्रको ८ औँ महाधिवेशनको अन्तिम तिर आइपुग्दा नाटकिय परिवर्तन आउँने अवस्था देखिएको छ ।

सर्वसम्मत केन्द्रिय कमिटी चयन गरिसकेको माओवादी केन्द्रले अब केन्द्रिय कमिटी सदस्य मध्येबाट अध्यक्ष लगायत पदाधिकारी चयन गर्ने छ । अध्यक्षमा वर्तमान अध्यक्ष पुष्पकमल दहाल प्रचण्डनै हुने पक्कापक्की छ भने महासचिवको बिषय थप पेचिलो बन्दै गएको छ ।

यस अघि महासचिवको सबैभन्दा सशक्त दाबेदारका रुपमा हेरिएका नेताहरु जनार्दन शर्मा र बर्षमान पुन दुवैजना प्रचण्डको रोजाइमा पर्न नसकेको बताइएको छ । प्रचण्डले महासचिवका रुपमा एमसीसीको कट्टर विरोधीको रुपमा चिनिएका देव गुरुङलाई अघि सार्न लागेको बताइएको छ ।

महासचिवमा नेता जनार्दन शर्मा र देव गुरुङबीच प्रतिस्पर्धा हुने सम्भावना बढेको छ ।माओवादीको महासचिवमा नेताहरु वर्षमान पुन, जनार्दन शर्माबाहेक कृष्ण बहादुर महरा, पम्फा भुसाललगायतले पनि दावी गर्दै आएका थिए ।

महासचिवमा आकांक्षी धेरै भए पनि जनार्दन शर्मा र वर्षमान पुनबीच प्रतिस्पर्धा हुने अनुमान गरिँदै आएको थियो । अन्तिम घडीमा अध्यक्ष प्रचण्डले देव गुरुङलाई महासचिव बनाउन चाहेको बुझिएको छ ।

तर, शर्माले आफू चुनाव लडेर भएपनि महासचिव बनिछाड्ने बताउँदै आएका छन् । महासचिवमा सन्तुलन मिलाउन सकस पर्ने देखिएपछि अध्यक्ष प्रचण्डले यसअघि चर्चामा नआएको नाम देव गुरुङलाई अघि सारेका हुन् ।

प्रचण्डले गुरुङलाई अघि सारेसँगै शर्माले कुनै पनि हालतमा आफू महासचिवको दौडबाट पछि नहट्ने अडान लिएका छन् । उनले आफ्नो नाममा सहमति नहुने हो भने चुनावी प्रक्रियामा जान समेत तयार रहेको बताएका छन् । महासचिवमा अन्तिम समयसम्म सहमति बन्न नसकेको खण्डमा माहोल चुनावतिर जाने अवस्था बनेको एक नेताले बताए ।

माओवादीको पदाधिकारीका अन्य पदमा सन्तुलन मिलाउन खासै समस्या नभएपनि महासचिवमा भने प्रचण्डकै विश्वासपात्रहरुले दावी नछाड्दा सहमति जुटाउन सकस भएको हो । महासचिवमा दावी गर्ने शर्मा र पुन दुबै प्रचण्डका विश्वासपात्र हुन् ।

पछिल्लो समय प्रचण्डले महासचिव बनाउन चाहेका गुरुङ पार्टी विभाजन हुँदा वैद्य समूहतिर लागेका थिए । उनी बादलको नेतृत्वमा माओवादीमा फर्किएका नेता हुन् ।

माओवादीले सोमबार दिउँसो ललितपुरको सानेपामा केन्द्रीय कमिटीको पहिलो बैठक बोलाएको छ । सो बैठकबाट अध्यक्षसहित पदाधिकारी चयन गर्ने कार्यतालिका छ । यस्तै मनोनयन गर्न बाँकी केन्द्रीय कमिटीका सदस्यको सूची पनि प्रस्तुत गरिने बताइएको छ ।

प्रज्ञा भवनमा आइतबार बन्दसत्रका क्रममा प्रचण्डले २३६ जनाको केन्द्रीय कमिटी घोषणा गरेका थिए भने ६३ जना मनोनयन गर्न बाँकी छ । यस्तै अध्यक्ष र पदाधिकारीको चयन गर्न पनि बाँकी राखिएको थियो ।