यस्तो पनि भयो एमाले जिल्ला अधिवेशनमा रोचक छ कुरो !

प्रमुख प्रतिपक्षी दल नेकपा एमालेले देशका अधिकांश जिल्लामा एकसाथ जिल्ला अधिवेशन गर्यो । नयाँ नेतृत्व चयन गर्नका लागी भएको अघिवेशनको परिणाम धमाधम आइरहेको छ ।

कतै सर्वसम्मत त कतै निर्वाचनका माध्यम बाट नयाँ नेतृत्व एमाले जिल्ला कमिटीमा आइरहेको छ । यसै विचमा केहि जिल्लामा भने रोचक परिणामहरु पनि आइरहेका छन् । एमाले सिन्धुली जिल्ला बाट आएको परिणाम त्यस्तै एउटा रोचक घटनाक्रम बन्न पुगेको छ ।

एमाले सिन्धुलीको अध्यक्षमा कुमारबहादुर कार्की निर्वाचित भएका छन् । उनले आफ्नै ज्वाईंलाई पराजित गर्दै उनी ४८८ मतसहित निर्वाचित भएका हुन् । कार्कीले निकटतम प्रतिद्वन्द्वी प्रदीप कुमार कटुवाललाई पराजित गरेका हुन् ।

सर्वसम्मत नेतृत्व चयन गर्न सम्भव नरहेपछि एमाले सिन्धुली नयाँ कार्यसमिति चयनका लागि निर्वाचन प्रक्रियामा गएको थियो । नेतृत्व चयनका लागि आइतबार मतदान गरेको थियो । निर्वाचनमा कुल ९०३ मत खसेको थियो ।निर्वाचनमा कटुवालले ४०८ मत प्राप्त गरेका थिए । निर्वाचनमा पराजित भएका कटुवाल बागमती प्रदेशसभा सदस्य हुन् भने उनी कार्कीका ज्वाइँ समेत हुन् ।

त्यस्तै उपाध्यक्षमा कर्ण बहादुर घिसिङ ४४९ मतका साथ विजयी भएका छन् । उनले जगदीश्वर तोलाङे र विनोद कुमार खड्कालाई पराजित गरेका हुन । तोलाङेले २१ मत पाउँदा खड्काले ४०४ मत पाएका थिए ।

त्यस्तै उपसचिवमा रश्मिला देवकोटा र मञ्जु देवकोटा निर्वाचित भएका छन् । रश्मिलाले ४६५ मत र मञ्जुले ४४५ मतका साथ विजयी भएका हुन ।उनका निकटतम प्रतिद्वन्द्वी खड्ग रजनले ३११ मत पाए भने नवराज थिङले ४४० मत पाए । सचिव पदमा भने यश अघि नै सर्वसम्मत चयन भइसकेको छ ।