राजाकै हैसियतका सडकमा निस्कँदै ज्ञानेन्द्र शाह !

३०० औँ पृथ्वी जयन्तीको अवसरमा आज पूर्व राजा ज्ञानेन्द्र शाह सिंहदरबार स्थित पृथ्वी नारायण शाहको सालिकमा माल्यार्पण गर्न जाँदैछन् । ज्ञानेन्द्र बाहिर निस्कने अघिल्लो दिननै आएको उनको विज्ञप्तीले भने राजनितीक वृतमा ठूलै हल्लाखल्ला मच्चीएको छ ।

ज्ञानेन्द्र शाहको सचिवालयको तर्फबाट हिजो एकै दिन दुईवटा विज्ञप्ती जारी भए जसमा उनलाई राजाकै हैसियतमा सम्बोधन गरिएको छ । पूर्वराजा नभनिकन श्री ५ महाराजधिराज ज्ञानेन्द्र विरविक्रम शाह भनेर नै सम्बोधन गरेर विज्ञप्ती आएको छ । यसले राजनितीक वृतमा तरंग आएको छ ।

पहिलो विज्ञप्तीमा ज्ञानेन्द्रले आज सिंहदरबार पुगेर गरिने कार्यक्रमबारे जानकारी मात्रै छ भने दोस्रो विज्ञप्तीमा उनले राजनितीक स्टेटमेन्टनै दिएका छन् । पृथ्वी जयन्ती तथा एकता दिवसकै अवसरमा भनेर विज्ञप्ती जारी भए पनि त्यहाँ उल्लेखीत भाषा , सन्दर्भ र विषयवस्तुले दरो पोलिटिकल स्टेटमेन्ट ज्ञानेन्द्रले दिएका छन् ।

राजाकै हैसियतमा सम्बोधन गरेर जारी गरिएको विज्ञप्तीमा ज्ञानेन्द्रले अहिलको व्यवस्थाले जनतको हित नगर्ने जिकिर गरेका छन् । अहिलेको व्यवस्थालाई जनताले मन नपराएको भन्दै उनले यो व्यवस्था समयको बर्वादी मात्रै भएको जिकिर गरेका छन् । पछिल्लो समय ज्ञानेन्द्रले लगातार पोलिटिकल स्टेटमेन्ट दिइरहेका छन् । यसलाई अर्थपूर्ण रुपमा हेरिएको छ ।

पूर्वराजा ज्ञानेन्द्रलाई राजाकै रुपमा सम्वोधन गरेर विज्ञप्ती जारी गरिएको विषयमा बुझ्न ओटीभी नेपालले उनका संवाद सचिव फणिन्द्रराज पाठकलाई टेलिफोन गर्दा उनले आफुले कहिल्यै पनि पूर्वराजा नभनेर राजाकै रुपमा सम्बोधन गर्ने गरेको जवाफ दिएका छन् । पूर्वराजा भन्दा वर्तमान राजा चाँही को हो त? भन्ने प्रश्न धेरै आएकाले यस्तो गरिएको उनले बताए ।

राजा कहिल्यै पनि पूर्व नहुने जिकिर पनि पाठकले गरेका छन् । पूर्वराजा भन्नलाई बर्तमान राजा को हो देखाउँन सक्नु पर्यो त्यो देखाउँन हामी सँग छैन त्यसैले पूर्व नलेखिकन राजाकै हैसियतमा विज्ञप्ती जारी गरिएको हो । ओटीभी नेपाल सँग पूर्वराजाका संवाद सचिव फणिन्द्रराज पाठकले भने ।

३००औँ पृथ्वी जयन्ती भएका कारण विशेष रुपमा मनाउँनका लागी यो पटक यस्तो तयारी गरिएको उनले बताए । अर्को पटक के हुने हो यसै भन्न नसकिने उनले जानकारी दिए । निर्मल निवासको तर्फबाट जनसहभागीलाई कुनै अनुरोध नगरिएको जानकारी पनी उनले दिएका छन् । कुनै सभा नगर्ने गाडीमा गएर माल्यार्पण मात्रै गरिने कार्यक्रम भएको पाठकले बताएका छन् ।

पूर्वराजा शाहले देश पराईहरुको खेल मैदान बनिसकेकोले हरेक नेपालीले खतराको अनुभूति गरिरहेको बताएका छन् । उनले ३०० औं पृथ्वी जयन्ती तथा राष्ट्रिय एकता दिवसको अवसरमा शुभकामना सन्देश जारी गर्दै राष्ट्रियताका आधारहरुमाथि प्रहार भई देशको अस्तित्वसमेत संकटमा परेको अवस्थामा एकताको महत्व र पृथ्वीनारायण शाहका योगदान एवं दिव्य उपदेशको सान्दर्भिकता थप बढेको उल्लेख गरेका छन् ।

‘राष्ट्र निर्माताबाट परराष्ट्र मामिलाका नीति र व्यवहारको संवेदनशीलतालाई सदैव आत्मसात गरिरहनुपर्ने सन्देश तथा दिव्य उपदेशका उपेक्षाका कारण नै यतिबेला हामी असन्तुलनको परिणाम व्यहोर्दै छौं,’ सन्देशमा पूर्वराजा शाहले भनेका छन् ।

राष्ट्रको कीर्ति र जनताको सुखबाहेक प्रजातन्त्रको अर्को कुनै लक्ष्य हुन नसक्ने उनले प्रस्ट पारेका छन् । ‘जनइच्छा र प्रगतिसँग सरोकार नराख्ने प्रणालीका नम जनतन्त्र, जनवाद, लोकतन्त्र, गणतन्त्र, जनगणतन्त्र, जेसूकै चयन गरियून, यसले राष्ट्रहित र जनसेवाको चरित्र धारण गरेको छैन भने त्यो निरर्थक साबित हुनेछ,’ सन्देशमा उनले भनेका छन् ।

प्रणाली केवल साधन हुने र साधन परिवर्तनलाई नै महान उपलब्धिका रुपमा वर्णन गर्ने प्रयास हुँदै आएको उनको भनाइ छ । ‘सबैभन्दा उन्नत दाबी गरिएको तन्त्रमा जनताले सास्ती र राष्ट्रले अस्तित्वप्रति नै चिन्ता गर्नुपर्ने परिस्थिति बन्दछ भने त्यस्तो तन्त्रमा अभ्यासको व्यर्थ प्रयासमा समय बर्बाद गर्न नहुने निष्कर्षमा पुग्न विलम्ब गरिनु हुँदैन,’ उनले भनेका छन् ।

उनले आफ्नो गौरवमय अस्तित्वलाई जोगाइराख्न हिमाल, पहाड र तराईका जनता सबै एक बन्न पनि आह्वान गरेका छन् । उनले भनेका छन्, ‘हाम्रो राष्ट्रियता सुदृढ राखौं अनि समग्र राष्ट्रलाई सिँगारौँ भन्ने हाम्रो आजको आकांक्षा र आवश्यकता हो ।’