जम्मा ३० सेकेण्डको फरकमा बालुवाटारमा ओली र प्रचण्ड विच जे भयो…

झण्डै सात महिना पछि प्रमुख प्रतिपक्षीदल नेकपा एमालेका अध्यक्ष केपी ओली प्रधानमन्त्री निवास बालुवाटार पुगेका छन् । रोचक पक्ष लगभग दुस्मनीकै तहमा सम्बन्ध भएका प्रचण्ड पनि देउवा र ओली विचको भेटघाटमा सहभागी छन् ।

एमसीसी पास गर्न तयार छौँ भनेर प्रधानमन्त्री शेरबहादुर देउवा सँग मिलेर गरेको संयुक्त हस्ताक्षरको पत्र सार्वजनिक भए पछि विहानै देखी तनावमा रहेका प्रचण्ड झण्डै ३० सेकेण्डको फरकमा अ‍ोली सँगै बालुवाटार छिरेका थिए ।

सुरुमा ओली सँग माधव नेपाल विना एक्लै भेट्न नमानेका प्रचण्ड देउवाले नमाने पछि एक्लै भए पनि बालुवाटार पुगेका थिए । ठूला राजनितीक दलका मूल नेतृत्वमा रहेका देउवा , ओली र प्रचण्ड विचको आजको भेटघाटलाई अर्थपुर्ण हेरिएको छ । सार्वजनिक तस्बिरमा ओलीले हँसिलो मुख लगाएको देखिन्छ भने प्रचण्डको अनुहार निकै निरास र मलिन देखिन्छ ।

बालुवाटारको यो छलफललाई अर्थपूर्ण मानिएको छ । ओली प्रधानमन्त्रीबाट हटेपछि पहिलोपटक बालुवाटार पुगेका हुन् ।बैठकमा सञ्चारमन्त्री ज्ञानेन्द्रबहादुर कार्की र एमाले महासचिव एमाले महासचिव शंकर पोखरेल पनि सहभागी छन् ।

त्यसअघि आइतबार बिहान नौ बजे प्रधानमन्त्री देउवा र माओवादी केन्द्रका अध्यक्ष पुष्पकमल दाहाल प्रचण्डबीच बालुवाटारमा भेटवार्ता भएको थियो । देउवा र प्रचण्डबीचको भेटवार्तामा एमसीसीबारे छलफल भएको थियो । प्रचण्डसँगको छलफलमा प्रधानमन्त्री देउवाले आगामी आगामी माघ २६ गते बुधबार बस्ने प्रतिनिधि सभा बैठकमा एमसीसी टेबल गर्न जोड दिएका थिए ।

जवाफमा प्रचण्डले एमसीसीमा सहमति जुटि नसकेको भन्दै केही दिन पर्खन सुझाव दिएका थिए । देउवासँगको छलफलमा प्रचण्डले बरु प्रमुख प्रतिपक्षसँग पनि छलफल गरेर अघि बढ्दा उपयुक्त हुने धारणा राखेका थिए । देउवा प्रचण्डको यो कुराकानीपछि देउवाले तत्काल ओलीलाई फोन गरेर बालुवाटारमा चार बजे छलफलका लागि बोलाएका थिए ।

यसैबीच एमसीसी बोर्डलाई देउवा र प्रचण्डले गत असोजमा लेखेको पत्र र बोर्डले पठाएको जवाफीपत्रका बारेमा देउवा प्रचण्डबीच कुनै नोकझोक नभएको प्रचण्डको सचिवालयले जनाएको छ । पत्र सार्वजनिक भएपछि प्रचण्डले एकतर्फी पत्र सार्वजनिक गरेको भन्दै देउवासँग असन्तुष्टि जनाएका खवर सार्वजनिक भएका थिए ।

‘कुनै नोकझोक भएको होइन र उहाँहरूबीच विहान टेलिफोन नभई भेटवार्ता नै भएको हो’, प्रचण्डको सचिवालयले भन्यो, ‘एमसीसीको पत्र सर्वजनिक भएपछि माओवादीमा तरंग सिर्जना भएको भनाई पनि सत्य होइन ।’ प्रचण्डको सचिवालयले पत्रमा देउवा र प्रचण्डको हस्ताक्षर भएको पत्र एमसीसी पारित गर्ने भनेर नभई सहमति जुटाउने भनिएको दावी समेत गरेको छ ।