प्रचण्ड र नेपालबीच भेटवार्ता, एमसीसीबारे छलफल

नेकपा माओवादी केन्द्र का अध्यक्ष पुष्पकमल दाहाल ‘प्रचण्ड’र नेकपा एकीकृत समाजवादी का अध्यक्ष माधवकुमार नेपालबीच भेटवार्ता भएको छ।

बुधबार बिहान प्रचण्ड निवास खुमलटार भएको भेटमा प्रचण्ड र नेपालबीच एमसीसी परियोजना, स्थानीय निर्वाचन, पछिल्लो राजनीतिक घटनाक्रमबारे गम्भीर छलफल भएको बताइएको छ।

प्रधानमन्त्री शेरबहादुर देउवाले एमसीसी संसद्‍मा टेबल गर्न दबाब दिएपछि उनीहरुबीच भेटवार्ता भएको हो। एमसीसीबारे सत्ता गठबन्धन विभाजित छ। प्रधानमन्त्री देउवाले सभामुख अग्निप्रसाद सापकोटाको विकल्प खोजेर भएपनि संसद्मा एमसीसी टेबल गर्ने तयारी गरेका छन्। सत्ता सहयात्री प्रचण्ड र नेपाल एमसीसीमा तगारो बनेपछि देउवाले विकल्प खोजेर संसदबाट एमसीसी पारित गर्ने तयारी गरेको हो।

अमेरिकाको वासिङ्टन डिसीस्थित अमेरिकी सहयोग परियोजना मिलेनियम च्यालेन्ज कर्पोरेसन (एमसीसी)ले प्रतिबद्धता गरेबमोजिम एमसीसी पारित गर्ने प्रक्रिया अघि बढाउन प्रधानमन्त्री देउवा र प्रचण्डलाई आग्रह गरेको छ।फेब्रुअरी ३ मा एमसीसी मुख्यालयले संयुक्तरुपमा प्रधानमन्त्री देउवा र अध्यक्ष दाहाललाई पत्र पठाउँदै सन् २०२२, फेब्रुअरी २८ भित्रमा एमसीसी मुख्यालयसँग प्रतिबद्धता गरेबमोजिम एमसीसी पारित गर्न देउवा र प्रचण्डलाई आग्रह गरेको उल्लेख छ। एमसीसी मुख्यालयलाई पत्र लेखेपछि थप दबाबमा परेका प्रधानमन्त्री देउवाले सत्ता गठबन्धनबीच सहमति गराएर एमसीसी पास गर्ने मनस्थितिमा छन्।

बुधबारका लागि तय भएको प्रतिनिधि सभाको बैठक सभामुख सापकोटाले मंगलबार अबेर सूचना निकालेर स्थगित गरेका थिए। बुधबार नै बस्ने भनिएको कार्यव्यवस्था परामर्श समितिको बैठकमा एमसीसी टेबल गर्न छलफल गर्ने तयारी भएको थियो। संसद स्थगित भएपछि फेरी एक पटक प्रधानमन्त्रीले गठबन्धनको बैठकमा एमसीसीबारे निर्णायक छलफल गर्ने तयारी गरेका छन्।