अग्नी सापकोटालाई सभामुखबाट हटाउँन देउवा तयार !

एमसीसी बोर्डले अन्तिम मितीनै तोकेर एमसीसी बारे छिनोफानो गर्न अल्टीमेटम दिए पछि बिषय थप पेचिलो बनेको छ । कुनै पनि हालतमा तत्कालै एमसीसी पास गरि छाड्ने मूडमा प्रधानमन्त्री देउवा देखिएका छन् ।

प्रधानमन्त्री देउवाले एमसीसी निर्णयार्थ सदनमा टेबुल गर्न सभामुख अग्नी सापकोटालाई पटक पटक दबाव दिँदै आएका छन् । सभामुख सापकोटाले यथाअवस्थामा एमसीसी टेबुल गर्न आनाकानी गरे पछि उनलाई पदबाट हटाएर भए पनि एमसीसी अघि बढाउँने मुडमा प्रधानमन्त्री पुगेको बताइएको छ ।

प्रमुख प्रतिपक्षी दल नेकपा एमालेले पनि सभामुख सापकोटाको बहिर्गमनको मुख्य सर्त बनाएको छ । आफुले कारबाही गरेका मााधव कुमार नेपाल सहितका १४ जना सांसदलाई कारबाही नगरेको भन्दै सभामुख सँग आक्रोसित बनेको एमाले बदला लिन दाउ पर्खिएर बसेको छ ।

नेपाली काग्रेस र एमाले मिलेर सभामुख सापकोटा विरुद्ध महाअभियोग आउँन सक्ने सम्भावना बढेर गएको राजनितिक वृतमा चर्चा चलेको छ । एमालेको युवा नेता तथा प्रतिनिधी सभाका सांसद महेश बस्नेतले सभामुख सापकोटालाई महाअभियोग लगाउँन एमालेका १०० जना सांसद तयारी अवस्थामा रहेको बताइसकेका छन् ।

प्रधानमन्त्री देउवाको विश्वास पात्र समेत रहेको काग्रेस नेता एवं प्रतिनिधीसभा सदस्य मिन विश्वकर्माले एमसीसी छोडेर गठबन्धन बचाउँन काग्रेसलाई कुनै चासो नभएको बताएका छन् । प्रधानमन्त्री देउवाको कोर टिममा सभामुखलाई हटाएर भए पनि एमसीसी पास गर्नु पर्ने घनिभूत छलफल भएको बताइएको छ ।

फागुन २ भित्र एमसीसीबारे गठबन्धन दलहरुबीच सहमति कायम भए सहजै एमसीसी टेबल हुनेछ। काग्रेस नेताहरुका अनुसार फागुन दुईभित्र सहमति कायम नभए प्रधानमन्त्री देउवाले अर्को विकल्पका रुपमा सभामुख हटाउने प्रक्रिया सुरु गर्ने तयारी गरेको बालुवाटार स्रोतले जनाएको छ ।

सभामुखको विकल्प खोज्न एमाले र लोकतान्त्रिक समाजवादी पार्टी (लोसपा) ले समेत साथ दिने प्रतिबद्धता प्रधानमन्त्री देउवालाई दिइसकेका छन् । आफ्नो डबल रोल पनि बाहिरिएको र सभामुख सापकोटाको पद पनि धरापमा परे पछि माओवादी केन्द्रका अध्यक्ष प्रचण्ड निकै दबावमा परेका छन् । सभामुखको पद जोगाउँन उनले दौडधुप सुरु गरेका छन् ।

संसदको ठूलो दल एमालेले आफूले कारबाही गरेको १४ सांसद पदमुक्त भएको सूचना समामुखले टाँस नगरेको जनाउँदै संसद् बैठक अवरुद्धदेखि सर्वदलीय बैठक बहिस्कार गर्दै आइरहेको छ। नेकपा एमालेका अध्यक्ष केपी शर्मा ओलीले सभामुख सापकोटालाई हटाउनु पर्ने र आफ्ना पार्टी छाडेर एकीकृत समावादी पार्टीमा गएका सांसदहरुलाई तत्काल हटाउनु पर्ने माग पटक–पटक गर्दै आएका छन् ।

नागरिक समाजका अगुवाहरुले समेत मंगलबार विज्ञप्ति निकालेर सभामुख सापकोटाले निष्पक्ष काम नगरेको भन्दै उनलाई हटाउन राजनीतिक दलहरुलाई आग्रह गरेका थिए । विज्ञप्तिमा सापकोटा हत्यामा किटानी जाहेरी गरिएका आरोपित भएको र उनीविरुद्ध काभ्रे जिल्ला प्रहरीदेखि सर्वोच्च अदालतको संवैधानिक इजलास र नियमित इजलासमासमेत हत्या आरोप तथा अनैतिक आचरणसम्बन्धी गम्भीर उजुरी र मुद्दाहरू विचाराधीन रहेको स्मरण गराउँदै पदको दुरुपयोगबाट न्यायमा अवरोध गरेकाले पदबाट हट्नुपर्ने माग गरिएको छ ।