प्रचण्ड र माधव नेपालका नाममा काग्रेस बैठकमा चर्काचर्की, देउवाले हस्तक्षेपनै गरे

सरकारको नेतृत्व गरिरहेको पार्टी नेपाली काँग्रेसको केन्द्रीय कार्यसम्पादन समिति बैठकमा विभिन्न विषयमा चर्काचर्की भएको छ ।

काग्रेस केन्द्रिय कार्यालय सानेपामा भएको बैठकमा प्रधानमन्त्री समेत रहेका काग्रेस सभापती शेरबहादुर देउवाले बैठकमा एजेण्डामै नभएको बिषयमा समेत छलफल गराएर एमसीसी पास गर्न काग्रेसमा एकमत रहेको सन्देश दिएका छन् । चुनावी गठबन्धको बिषय समेत उठे पछि देउवाले रुलिङ गर्दै यसबारे नबोल्न सचेत गराएका थिए ।

बैठकमा नेता रमेश रिजालले गठबन्धनबारे धारणा राखेका थिए । उनले चुनावमा गठबन्धन बनाएर जान नहुने तर्क राखे । उनले भने, ‘हामीले चुनावमा गठबन्धन बनाउन जरुरी छैन । काँग्रेस एक्लै चुनावमा जानुपर्छ ।’ रिजालले गठबन्धनको प्रसंग निकालेपछि सभापति देउवाले हस्तक्षेप गरे ।

उनले भने, ‘अहिले गठबन्धनको विषयमा केही नबोल्नुस् । यो गठबन्धनबारे छलफल गर्न राखिएको बैठक होइन । यसबारे उपयुक्त समयमा बैठक बस्छ । त्यहाँ राय राख्नुहोला ।’ त्यसपछि उनले गठबन्धनबारे थप धारणा नराखेको एक नेताले बताए । तर पूर्व महामन्त्री शशांक कोइरालाले भने देउवाको रुलिङका बीच गठबन्धनबारे धारणा राखे ।

‘हामीले आफ्नै अस्तित्व जोगाउनुपर्छ । काँग्रेसले एक्लै चुनाव लड्नुपर्छ ,’ उनले भने, ‘आ–आफ्नो विचार र एजेन्डा लिएर जनतामा जानु नै निर्वाचन हो । चुनावमा गठबन्धन जरुरी छैन ।’

यस्तै पूर्व उपसभापति गोपालमान श्रेष्ठले पनि चुनावमा जानेबारे ठोस नीति बनाउनुपर्नेमा जोड दिएका थिए । यस्तै सुनील थापाले चुनावलाई मध्यनजर राखेर भ्रातृ तथा शुभेच्छुक संस्थामा चाँडै विधानसम्मत कमिटी ल्याउनुपर्नेमा जोड दिए । उनले अधिवेशन हुन बाँकी जिल्लामा पनि यथाशिघ्र गर्नुपर्ने बताए । उनले भने, ‘महाधिवेशनबाट निर्वाचित पार्टी पङ्क्तिलाई क्रियाशील बनाएर चुनावमा परिचालन गरेर जानुपर्ने हुन्छ ।’

यता प्रवक्ता महतले बैठकमा स्थानीय निकायको निर्वाचनका विषयमा विस्तृत रुपमा चर्चा गरिएको बताए । उनले भने, ‘स्थानीय निकायको निर्वाचन वैशाख ३० गते जुन हुँदैछ, त्यो निर्वाचनमा नेपाली काँग्रेसले पार्टीलाई सशक्त ढंगबाट आफूलाई प्रस्तुत गर्ने, जनताको बीचमा अझ सशक्त ढंगले कसरी जोडिने रु र सफलता कसरी हाँसिल गर्ने रु त्यो एउटा छलफलको विषय छ ।’

प्रवक्ता महतले विधानको व्यवस्थाअनुसार पार्टीले भातृ संगठनहरुको बारेमा निर्णय गरेर अघि बढ्ने पनि बताए । ‘भातृ संगठनहरुको समय सीमा सकिएको छ । कतिपय त्यहाँका नेताहरु केन्द्रीय समितिमा निर्वाचित भएपछि पद स्वतः रिक्त भएको अवस्था छ,’ उनले भने ।

‘त्यसलाई ध्यानमा राखेर भ्रातृ संगठनलाई कसरी सुदृढ गर्ने र नयाँ नेतृत्व कसरी तोक्ने भन्ने विषय पनि आजको छलफलको उनको भनाइ छ । प्रवक्ता महतले बैठकमा वक्ताहरूले बोल्ने क्रम नसकिएकोले शुक्रबार पनि छलफल चल्ने बताएका छन्

सभामुख अग्नि सापकोटाले एमसीसी रोकेर नरोकिने प्रवक्ता महतले बताए । एमसीसी सदनमा लैजाने कुरामा सभामुखले आफ्नो पदीय दायित्व निभाउनुपर्ने उनको भनाइ छ । ‘सभामुखले आफ्नो काम कर्तव्य र दायित्व बुझ्नुपर्छ, पदीय जिम्मेवारीबाट भाग्न मिल्दैन,’ महतले भने, ‘एमसीसीबारे संसदले निर्णय लिन पाउनुपर्छ ।’

यस्तै सरकारको प्रवक्ता समेत रहेका सञ्चार तथा सूचना प्रविधि मन्त्री ज्ञानेन्द्रबहादुर कार्कीले एमसीसीलाई संसदमा लैजानुको विकल्प नरहेको बताए । समितिको बैठकपछि उनले भने, ‘एमसीसीलाई निष्कर्षमा पुर्याउनुको विकल्प छैन । हामीले निष्कर्षमा पुर्याएर संसदमा लैजान्छौँ ।’

सरकारले प्रस्तुत गर्ने स्थापित मान्यताअनुसार एमसीसी संसदमा टेबुल हुने उनले बताए । उनले भने, ‘यही मिति भन्ने छैन तर हामी संसदमा लैजान्छौँ । संसदमा पेस गर्ने स्थापित मान्यता रोकेर रोकिँदैन ।’