माधब नेपालको प्रस्ताब देउवाले गरे स्विकार !

नेकपा (एकीकृत समाजवादी) का अध्यक्ष माधब नेपालका कारण आजको प्रतिनिधिसभा बैठकमा एमसीसी टेबल नहुने भएको छ । नेपालले यहि फागुन ८ गते आईतबारसम्मका लागि पर्खन गरिएको प्रस्तावलाई कांग्रेस सभापतिसमेत रहेका प्रधानमन्त्री शेरबहादुर देउवाले स्वीकार गरेका हुन् ।

सत्तारुढ गठबन्धनको बैठकमा अहिले नै एमसीसीबारे एक मत हुन नसकिएको र एकीकृत समाजवादीका अध्यक्ष नेपालले आफ्नो पार्टीको स्थायी कमिटी बैठकसम्म पर्खिन आग्रह गरेपछि प्रधानमन्त्री देउवा त्यसमा सहमत भएका हुन् ।

आजको बैठकमा पनि देउवाले तत्काल एमसीसी संसदमा पेस गर्ने प्रस्ताव गरेका थिए । नेपालले भने पार्टीको स्थायी कमिटी बसेर औपचारिक धारणा बनाउने भन्दै प्रधानमन्त्रीसँग एमसीसीमा हतार नगर्न आग्रह गरेका थिए । बैठक एक घण्टामै सकिएको छ ।

फागुन ८ गते बिहान १० बजे फेरि बैठक बस्ने र यसबारे अचावश्यक निर्णय लिइने निष्कर्षसहित आजको बैठक सकिएको सञ्चारमन्त्री ज्ञानेन्द्र बहादुर कार्कीले बताए । गठबन्धनको बैठकलगत्तै गृहमन्त्री बालकृष्ण खाण, कानूनमन्त्री दिलेन्द्रप्रसाद बडू र सञ्चारमन्त्री ज्ञानेन्द्रबहादुर कार्कीसँग प्रधानमन्त्रीले परामर्श गरेका थिए ।

आज संसद बैठक १ बजे बोलाइएको छ । त्यसैको सन्दर्भमा छलफल गर्न मन्त्रीहरू बालुवाटार जान थालेका छन् । आजको प्रतिनिधिसभा बैठकमा एमसीसीको विषयलाई कार्यसूचीमा राखिएको छैन ।

यस्तै सत्ता गठबन्धनका शीर्ष नेतासँगको छलफल लगत्तै प्रधानमन्त्री तथा काँग्रेस सभापति शेरबहादुर देउवा आफ्नै पार्टीका केही मन्त्री र काँग्रेसकै नेताहरुसँग आन्तरिक परामर्शमा जुटेका छन् ।

शुक्रबार बिहान सत्ता गठबन्धनका नेताहरु पुष्पकमल दाहाल ‘प्रचण्ड’, माधवकुमार नेपाल र उपेन्द्र यादवसँग एमसीसीबारे छलफल गरेका प्रधानमन्त्री देउवाले त्यसलगत्तै गृहमन्त्री बालकृष्ण खाण, सञ्चारमन्त्री ज्ञानेन्द्रबहादुर कार्की र कानुन मन्त्री दिलेन्द्र बडुलाई बालुवाटार बोलाएर परामर्श थालेका हुन् । देउवासँगको परामर्शमा काँग्रेस संसदीय दलकी सचेतक पुष्पा भुसाल पनि सहभागी छन् ।