न्यायिक समितिको सारथी : सर्वोत्कृष्ट पुस्तकका रूपमा सम्मानित

काठमाडौँ, श्रावण २७ गते नेपाल कानुन व्यवसायी परिषद्को ३४औँ स्थापना तथा आत्ममूल्याङ्कन दिवसका अवसरमा आर्थिक वर्ष २०८२/०८३ मा प्रकाशित कानुन तथा न्याय क्षेत्रका पुस्तकहरू मध्येबाट अधिवक्ताद्वय उद्धव प्रसाद अधिकारी र रामबाबु नेपालद्वारा लिखित ‘न्यायिक समितिको सारथी’ उत्कृष्ट पुस्तकका रूपमा पुरस्कृत भएको छ। रिनोवेसन नेपालले प्रकाशन गरेको यस व्यावहारिक सन्दर्भग्रन्थका लेखकहरूलाई समारोहका प्रमुख अतिथि सर्वोच्च अदालतका प्रधानन्यायाधीश डा. मनोजकुमार शर्माले सम्मानपत्र तथा नगद पुरस्कार प्रदान गर्नुभयो। नेपालको संविधान र स्थानीय सरकार सञ्चालन ऐनका आधारमा तयार पारिएको यस पुस्तकमा स्थानीय तहका न्यायिक समितिको अधिकारक्षेत्र, उजुरी व्यवस्थापन, मेलमिलाप प्रक्रिया, निर्णय लेखन र अभिलेख व्यवस्थापनजस्ता विषयलाई अत्यन्त सरल र अभ्यासमूलक ढङ्गले प्रस्तुत गरिएको छ, जसले जनप्रतिनिधि, कानुन अधिकृत, मेलमिलापकर्ता तथा कानुन व्यवसायीहरूलाई व्यावहारिक कार्यसम्पादनमा प्रत्यक्ष सहयोग पुर्‍याउँछ।

संघीय शासन प्रणालीअन्तर्गत स्थानीय स्तरमै नागरिकलाई न्यायमा सहज पहुँच पुर्‍याउने र न्यायिक समितिको संस्थागत क्षमता अभिवृद्धि गर्ने उद्देश्यले तयार पारिएको यो पुस्तक स्थानीय न्यायिक अभ्यास र मेलमिलाप प्रणालीका लागि एउटा महत्त्वपूर्ण मार्गदर्शक बनेको छ। सम्मान ग्रहण गर्दै लेखकद्वय अधिकारी र नेपालले प्राप्त पुरस्कारलाई व्यक्तिगत उपलब्धिभन्दा पनि स्थानीय न्याय प्रणाली र मेलमिलापको संस्थागत विकासमा गरिएको प्रयासको कदरका रूपमा स्वीकारेको बताए। कानुन व्यवसायको विकाससँगै अनुसन्धानमूलक लेखनलाई प्रोत्साहन गर्दै आएको परिषद्‌द्वारा आयोजित उक्त समारोहमा कानुन तथा न्याय क्षेत्रका विशिष्ट व्यक्तित्व, न्यायाधीश, वरिष्ठ अधिवक्ता, परिषद्का पदाधिकारी र कानुनी विज्ञहरूको बाक्लो उपस्थिति रहेको थियो। स्थानीय तहमा न्यायिक अभ्यास सुरु भएको एक दशकमा देखिएका प्रक्रियागत जटिलतालाई सम्बोधन गर्न सफल भएकोले यस पुस्तकको सम्मानलाई स्थानीय न्याय क्षेत्रको अध्ययन र लेखनमा प्राप्त ठूलो मान्यताका रूपमा हेरिएको छ।